Atyraýda qos aýrýhana kásipkerlerge 900 mln teńgeden astam qarjyny tólemeı kelgen
Atyraý oblysy boıynsha Sybaılas jemqorlyqqa qarsy is-qımyl departamentiniń baspasóz qyzmetinen málim etkendeı, eki aýrýhana basshylarynyń kásipkerlerge 900 mln teńgeden astam qarjyny tólemegeni anyqtalǵan. Kásipkerlerge qaryz bolǵan emdeý ornynyń biri – munaıly shahardaǵy №2 oblystyq aýrýhana. Ekinshisi – Qurmanǵazy aýdandyq ortalyq aýrýhanasy.
«Departament qyzmetkerleri Atyraý oblystyq densaýlyq saqtaý basqarmasynyń №2 oblystyq aýrýhanasy men Qurmanǵazy aýdandyq aýrýhanasynyń jumysyna monıtorıng júrgizdi. Monıtorıng qorytyndysymen 64 kásipkerlik sýbektisine memlekettik satyp alý boıynsha kórsetilgen qyzmetter men taýarlardy jetkizgeni úshin 900 mln teńgeden astam aqshalaı qarajatty tólemeý faktileri anyqtaldy. Osyǵan baılanysty mán-jaıdy anyqtaý maqsatynda atalǵan medıtsınalyq mekemelerge tıisti hat joldandy», - dep habarlady departamenttiń baspasóz qyzmeti.
Departament qyzmetkerleriniń yqpal etýimen medıtsınalyq mekemeler 13 kásipkerlik sýbektisine 54,6 mln teńge kólemindegi qarjyny tóledi.
Buryn atalǵan aýrýhananyń biri kásipkerge azyq-túlik jetkizgeni jáne klımattyq jabdyqtarǵa tehnıkalyq qyzmet kórsetý úshin aqsha aýdarýdan bas tartqan. Biraq, departament qyzmetkerleri aralasqannan keıin kásipkerdiń ótinishi tolyǵymen qanaǵattandyryldy.
Eske sala ketelik, buǵan deıin Atyraýda monopolıst kásiporyn 99 kásipkerge 739 mln teńge qaryz bolǵanyn habarlaǵan edik. Departament basshysy Erulan Serikqalıevtyń aıtýynsha, bul – «Atyraý oblysy Sý Arnasy» KMK kórsetilgen qyzmetter men taýarlardy jetkizgeni úshin tólemegen qarjy.