Atyraýda koronavırýsty qala turǵyndary jıi juqtyryp jatyr

ATYRAÝ. QazAqparat – Atyraýda koronavırýs ınfektsııasy qala turǵyndarynan kóbirek anyqtalyp jatyr, dep habarlaıdy QazAqparat.

Óńirlik kommýnıkatsııalar qyzmetiniń málimetine súıensek, ótken táýlikte qaýipti indettiń belgisi 23 turǵynnan tabylǵan.

«Naýqastardyń arasynda Atyraý qalasynyń 21 turǵyny bar. Onyń 12-si – er, toǵyzy – áıel. Skrınıngten ótý jáne JRVI klınıkalyq sımptomymen medıtsınalyq kómekke júginý kezinde naýqastardan koronavırýs ınfektsııasynyń belgisi tabylǵan. Sondaı-aq, Jylyoı aýdanynyń 2 turǵyny da indet juqtyrǵan» dep habarlady óńirlik kommýnıkatsııalar qyzmetinen.

Qazir indetti juqtyrǵandar ınfektsııalyq aýrýhanaǵa jatqyzylyp, bekitilgen hattamaǵa sáıkes em qabyldap jatyr. Al, olarmen baılanysta bolǵandar dárigerler baqylaýyna alynyp, indet oshaqtaryna dezınfektsııalyq jumystar júrgizilýde.

Atyraý oblysynda koronavırýs ınfektsııasyna shaldyqqandar sany 1640 adamǵa jetti. Jazylyp shyqqandar –1376 adam.

Eske sala ketelik, buǵan deıin Atyraý oblystyq aýrýhanasynda 400 oryndyq ınfektsııalyq statsıonar ashylatynyn jazǵan edik.