Atyraýda kópqabatty turǵyn úıler jylý júıesine qosyldy

ATYRAÝ. QazAqparat - Atyraýda Nursaıa yqshamaýdanyndaǵy  kópqabatty 45 úı ortalyq jylý júıesine qosyldy. Qurylys jumystary 14 jeltoqsan kúni aıaqtalady dep josparlanýda, dep habarlaıdy QazAqparat tilshisi qala ákimdiginiń baspasóz qyzmetine silteme jasap.

Qazirgi ýaqytta ázirlengen jobalyq-smetalyq qujattamaǵa sáıkes, Nursaıa yqshamaýdanynda ornalasqan kóp qabatty turǵyn úılerdi ortalyqtandyrylǵan jylý júıesine qosý jumystaryn «Garant Stroı 2008» JShS mekemesi júrgizýde.

«Atyraý jylý jelileri» AQ vıtse-prezıdenti Álibek Temirǵalıevtiń aıtýynsha, Nursaıa yqshamaýdanyn iske qosý oń nátıjesin beredi.

«Birinshiden Nursaıa aýdanynda avtonomdy qazandyqtar jıi buzylyp, jóndeý jumystary óte qymbatqa shyqty. Ekinshiden, avtonomdy qazandyqtardy paıdalaný úshin  bilikti mamandar qajet, qalada maman tapshy. Úshinshiden, Nursaıa mańynda avtonomdy qazandyqtardyń turaqty jumysyn qamtamasyz etýge arnaıy hımııalyq tazartylǵan sý qajet. Bul da qıyndyqtar týdyrdy. Qalanyń ortalyq jylytý júıesi bolsa, árıne, ár úıdi bólek qazandyqtardy salýdan góri biriktirip, jalpylaı qamtý kerek. Jumys aıaqtalǵannan keıin barlyq búlingen asfalt alańdary qalpyna keltiriledi», - deıdi Álibek Temirǵalıev.