Atyraýda kópirden sekirýge oqtalǵan 40 jastaǵy áıel qutqaryldy

ATYRAÝ. QazAqparat – Atyraýda 40 jastaǵy áıel kópirden sekirýge oqtalǵan. Ony polıtsııa qyzmetkreleri qutqaryp qaldy, dep habarlaıdy QazAqparat.

Oqıǵa búgin, 29 mamyrda Atyraý qalasynda bolǵan.

«Atyraý qalalyq polıtsııa basqarmasynyń patrýldik polıtsııa qyzmetkerleri tańǵy saǵat 04:00 shamasynda ákimshilik aýmaqty patrýldeý kezinde ortalyq kópirden áıeldiń sýǵa sekirgeli turǵanyn baıqaǵan. Tártip saqshylary jedel áreket etip, ózine qol jumsamaý úshin kópirden sekirmekshi bolǵan 40 jastaǵy áıelmen 4 mınýttyq profılaktıkalyq kelissóz júrgizgen. Sóıtip, ony óz erkimen raıynan qaıtýǵa kóndirdi», -dep habarlady departamenttiń baspasóz qyzmeti.

Sýıtsıd jasaýǵa bekingen áıeldiń 1983 jylǵy ekeni anyqtaldy. Ol jedel-tergeý tobyna tapsyryldy. Qazir áıeldiń mundaı áreketke barý sebebi tekserilip jatyr.

Bul – sáýirden beri tirkelgen besinshi derek. Kópirden sekirýge oqtalǵandardyń ishinde 4 áıel, 1 er adam bar. Onyń ishinde 2-eýiniń jasy kámeletke tolmaǵan.

Eske sala ketelik, budan buryn Atyraýda bir aıǵa jýyq ýaqyt buryn joǵalǵan qyzdyń múrdesi tabylǵanyn jazǵan edik.

Jasóspirim qyz 6 sáýirde úıinen shyǵyp ketip, keri oralmaǵan. Keıin onyń kópirden kesirgeni anyqtaldy. Onyń múrdesi bir aıǵa jýyq ýaqyttan soń Jaıyq ózeninen tabyldy.

Al, 26 sáýirde 23 jastaǵy boıjetken kópirden sekirip ketti.

Sondaı-aq, 44 jastaǵy mas áıel kópirden sekirmek boldy.

Keıin 20 mamyrda 17 jastaǵy jasóspirim kópirden sekirip ketkenin habarlaǵan bolatynbyz.