Atyraýda kólikke quıatyn gaz tapshylyǵy týyndady
Osyǵan oraı oblys ákimi Mahambet Dosmuhambetov jedel keńes ótkizip, avtokólikterge qajet suıytylǵan gaz tapshylyǵynyń týyndaýyna jaýapty tulǵalardyń salǵyrttyǵy men shabandyǵyn qatań synǵa aldy.
«Jaýapty basqarma basshylary máseleni der kezinde sheshpeı, ýshyǵýyna jol berip otyr. «Atyraý munaı óńdeý zaýyty» JShS men salalyq Energetıka mınıstrligimen tyǵyz baılanys jasap, máseleni sozbaı rettegende mundaı jaǵdaı bolmas edi. Osy olqylyqqa tikeleı jaýapty tulǵalarǵa qyzmettik shara qoldanylady» - dedi Mahambet Dosmuhambetov.
Oblystyq energetıka jáne turǵyn úı-kommýnaldyq sharýashylyq basqarmasysy basshysynyń orynbasary Danııar Muqyshevtyń málimetinshe, Energetıka mınıstrliginiń josparyna sáıkes, aqpanda naýryz aıy úshin oblysqa qajetti 4600 tonna suıytylǵan gaz berý týraly keste jiberilgen. Alaıda «Atyraý munaı óńdeý zaýyty» JShS jóndeý jumystarynyń júrgizilýine baılanysty tıisti suıytylǵan gazdy bere almaǵan.
Qazir ózge kompanııalardan naýryz aıyna qajetti 4500 tonna tonna gazdy satyp alý boıynsha jumystar júrgizilýde. Oblysta suıytylǵan gazmen júretin avtokólikter táýligine shamamen 150 tonna gaz tutynady.
Oblys ákimi Mahambet Dosmuhambetov suıytylǵan gaz tapshylyǵy rettelgenge deıin máseleni baqylaýda ustaýdy tapsyrdy.