Atyraýda kólik nómirin shyǵaratyn qurylǵy iske qosyldy

ATYRAÝ. QazAqparat – Atyraýda kólik quraldaryna arnalǵan memlekettik tirkeý nómirin shyǵaratyn qurylǵy iske qosyldy, dep habarlaıdy QazAqparat.

«Azamattarǵa arnalǵan úkimet» memlekettik korporatsııasy» KEAQ Atyraý oblysy boıynsha fılıalynyń qoǵammen baılanys menedjeri Bekjan Ahmetovtiń aıtýynsha, nómirlerdi shyǵarýdy mamandandyrylǵan halyqqa qyzmet kórsetý ortalyǵy qolǵa alǵan. Endi kólik ıeleri nómirdi sanaýly kúnderde alady.

«Bıylǵy 11 aıda mamandandyrylǵan halyqqa qyzmet kórsetý ortalyǵynda 83 580 qyzmet kórsetildi. Onyń ishinde júrgizýshi kýáligin alýǵa baılanysty 27 818, kólik quralyna memlekettik tirkeý nómir belgilerin berý boıynsha 54 846 qyzmet usynyldy. Buryn atyraýlyq kólik quralyna nómir alý 20 kúnge sozylatyn. Sebebi, kólik nómiri Aqtóbe qalasynda jasalatyn edi. Qazir ony Atyraýdan 5 kúnniń ishinde alýǵa múmkindik týyp otyr» - deıdi Bekjan Ahmetov.

Onyń aıtýynsha, Atyraý oblysyna nómir belgilerin shyǵaratyn stanok ákelingen. Onda kúnine 500 nómir shyǵarylady.

Eske sala ketelik, budan buryn atyraýlyqtar bir aıda 18,8 mln teńgege qymbat nómirler satyp alǵanyn habarlap edik.