Atyraýda kólik aýdarylyp, 5 adam aýrýhanaǵa jetkizildi
Oblystyq polıtsııa departamenti baspasóz qyzmetiniń aqparatyna qaraǵanda, jol-kólik oqıǵasy búgin, 24 qazanda saǵat 17:15 shamasynda bolǵan.
«Atyraý qalasyndaǵy «Juldyz-3» shaǵyn aýdanynyń tusynda Toyota Hilux avtokóliginiń 23 jastaǵy júrgizýshisi solǵa qaraı burylý kezinde apattyq jaǵdaı týǵyzǵan. Sonyń saldarynan Atyraý qalasyna bara jatqan Toyota Ipsum avtokóligi jol jıegine aýdarylǵan. Bul kóliktiń rólinde 20 jastaǵy júrgizýshi bolǵan. Toyota Ipsum avtokóligindegi 5 jolaýshy ártúrli dene jaraqatyn aldy. Zardap shekken jolaýshynyń bári oblystyq aýrýhanaǵa jetkizildi», - dep habarlady departamenttiń baspasóz qyzmeti.
Polıtsııa qyzmetkerleri atalǵan jol-kólik oqıǵasyna baılanysty tıisti is-qujattardy jınaqtap, tergeý amaldaryn júrgizip jatyr.
Atyraý oblysynda jol-kólik oqıǵalary jıilep ketti, 21 qazannan beri kún saıyn tirkelgen. Osyǵan baılanysty patrýldik polıtsııa rotasynyń qyzmetkerleri júrgizýshilerge jolda júrý erejelerin qatań saqtaý qajettigin eskertip otyr.
«Qurmetti júrgizýshi, jol júrisine qatysýshy retinde basqa kólik quraldaryna qaýip tóndirmeı, ózińiz tasymaldap kele jatqan jolaýshylar aldyndaǵy úlken jaýapkershilikti sezinýińiz qajet. Jol qaýipsizdigin saqtaý ár júrgizýshiniń qolynda ekenin eskertemiz. Mereke kúnderi jol qozǵalysy qatysýshylarynyń jıileýine baılanysty qaýipsizdik sharalaryna muqııat bolǵanyńyz jón. Júrgizýshi kólik jyldamdyǵyn shektik mólsherden asyrmaı, saqtyq sharalaryn saqtaýy qajet», - dep málim etti departamenttiń baspasóz qyzmetinen.
Eske sala ketelik, budan buryn Atyraýda eki kólik soqtyǵysyp, 6 adam aýrýhana jetkizilgenin habarlaǵan edik.