Atyraýda kóligimen 17 keli marıhýana tasymaldaǵan júrgizýshi qamaýǵa alyndy
Oblystyq polıtsııa departamentiniń baspasóz qyzmetinen málim etkendeı, obystyq prokýratýranyń bastamasymen Ulttyq qaýipsizdik komıtetiniń Atyraý oblysy boıynsha departamenti jáne polıtsııa departamentiniń esirtki qylmysyna qarsy is-qımyl basqarmasynyń birlesýimen asa iri kólemde esirtki tasymaldaý faktisi anyqtaldy.
Tártip saqshylary «Qarasora» jedel aldyn alý sharasy kezinde «Atyraý-Aqtóbe» tas jolynyń 30-shaqyrymynda «Toyota Ipsum» markaly kólikti toqtatqan.
Kólikti tekserý kezinde jalpy salmaǵy 17 keli tartatyn marıhýana tabylǵan. Esirtki zaty tárkilendi.
«Qazir atalǵan derek boıynsha Atyraý qalalyq polıtsııa basqarmasynyń qyzmetkerleri QR Qylmystyq kodeksiniń 296-babynyń 4-bóligimen sotqa deıingi tergep-tekserýdi bastady. Asa iri kólemde esirtkini kóligimen tasymaldaǵan júrgizýshi ustaldy. Kúdikti qamaýǵa alyndy», - dep habarlady departamenttiń baspasóz qyzmeti.
Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.
Eske sala ketelik, buǵan deıin Atyraýda esirtki prıtonyn uıymdastyrǵan ózbekstandyq áıel ustalǵanyn habarlaǵan edik.
Ózbekstan Respýblıkasynda turatyn 1998 jylǵy áıeldiń jaldamaly páterin tintý kezinde untaq tárizdi zaty bar 2 polıetılen paket, ósimdik tektes qaǵaz túıinshek pen sıntetıkalyq esirtkini qoldanýǵa arnalǵan shyny qurylǵylar tabylǵan.
Aıǵaq retinde tirkeýge alynǵan zattar tárkilendi.