Atyraýda qazaqstandyq mamanǵa qaraǵanda sheteldiktiń jalaqysy 4,5 ese kóp bolǵan
Atyraý oblystyq memlekettik eńbek ınspektsııasy basqarmasynyń basshysy Igilik Áýbákirovtiń aıtýynsha, byltyr Bas Prokýratýranyń tapsyrmasymen 43 kompanııaǵa tekserý júrgizilip, jalaqy aıyrmashylyǵy boıynsha 109 derek anyqtalǵan. Sondaı-aq, sheteldik mamandar tarapynan ruqsat etilgen mindetin atqarýǵa sáıkes emestigine baılanysty 167 derek belgili bolǵan.
«Tekserý nátıjesimen 364 ákimshilik is toltyrylyp, 96 mln teńge aıyppul salyndy. Qazirge deıin memleket paıdasyna 73 mln teńge óndirildi. Aıyppuldyń qalǵan bóligi óndirilý ústinde. Buǵan qosa, sheteldik mamandy shaqyrý úshin berilgen 212 ruqsat keri qaıtaryldy. Osyǵan baılanysty 212 sheteldik Qazaqstan aýmaǵynan shyǵaryldy. Sondaı-aq, sheteldik mamandardy shaqyrýǵa berilgen 50 ruqsat merzimi bitken soń uzartylmaıdy», -dedi Igilik Áýbákirov.
Onyń málim etýinshe, qazaqstandyq mamandar men sheteldikter jalaqysynyń aıyrmasy da baıqalǵan. Máselen, «Sarens» kompanııasynyń qazaqstandyq sýpervaızeri 750 myń teńge jalaqy alǵan. Al, dál osyndaı jumysty atqarǵan sheteldik mamanǵa 3 mln 400 myń teńge tólengen. Aıyrma – 4,5 ese. Taǵy bir derek, qazastandyq ınjenerdiń jalaqysy 300 myń teńgeni qurasa, sheteldik ınjenerge 1 mln 300 myń teńge jalaqy eseptelgen.
«Zańdylyqty buzǵan kompanııalar ákimshilik jaýapkershilikke tartylyp, aıyppul salyndy. Bes kompanııa jalaqy kólemin bir deńgeıge sáıkestendirdi. Qalǵan kompanııalar sheteldik mamandar laýazymyn qysqartty. Qazir bul kompanııalarda sheteldik mamandar jumys jasamaıdy», -dedi Atyraý oblystyq memlekettik eńbek ınspektsııasy basqarmasynyń basshysy Igilik Áýbákirov.
Aıta ketsek, 24 qańtarda ótken Úkimettiń keńeıtilgen otyrysynda QR Prezıdenti Qasym-Jomart Toqaev sheteldik jáne jergilikti jumyskerlerge jalaqy tóleýde teńsizdikke jol bermeý kerektigin qadaı aıtqan edi.
Sondaı-aq, Premer-Mınıstrdiń orynbasary Berdibek Saparbaevtan osy jumystyń nátıjesin suraǵan bolatyn.