Atyraýda Qazaqstan halyqtarynyń birligi kúni keń kólemde atalyp ótýde

ATYRAÝ. QazAqparat - Atyraýda 1 mamyr - Qazaqstan halyqtarynyń birligi kúni aıasynda  mádenı-kópshilik sharalar uıymdastyrylyp jatyr, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.

Negizgi merekelik sharalar Sultan Beıbarys alańynan bastaý aldy. Atyraýlyqtar men qala qonaqtary aldynda etnomádenı birlestikterdiń shyǵarmashylyq ujymdary óner kórsetti.

Merekelik quttyqtaýda oblys ákimi Nurlan Noǵaev Qazaqstan halyqtary birligi kúnin atap ótýdiń mańyzdylyǵyna toqtaldy.

«Qazir aımaqta 17 etnomádenı birlestik bar. Ártúrli ult pen din ókilderi qoǵam damýyna úlesterin qosyp keledi. Uzaq jyldar boıy beıbitshilik pen kelisimde ómir súrip kelemiz, sonyń arqasynda Qazaqstan tolerantty el retinde álemge belgili. Memleket basshysy atap kórsetkendeı, Qazaqstannyń órkendep, damýy bizdiń bárimizdiń ortaq maqsatymyz, - dedi Nurlan Noǵaev.

Qazaqstan halyqtary birligi kúni merekesin uıymdastyrýshylar oıyn-saýyq baǵdarlamalaryn qamtyǵan.

Atap aıtsaq, Sultan Beıbarys alańynda «Aıda Kaýmenova» men «Nur-Shah» sán úıleri kıimderiniń kórmesi ótti.

15.00-de osy alańda «Almaly.kz» halyqaralyq balalar festıvaliniń saltanatty ashylýy bolady.

17.00-de Q.Smaǵulov alańynda «Street workout» boıynsha Atyraý qalasynyń ashyq kýbogy sarapqa salynady.

 19.00-de Sultan Beıbarys alańynda merekelik kontsert bastalady.

Abaı Abylaev