Atyraýda qazaq kúresinen el chempıonaty aıaqtaldy

ATYRAÝ. QazAqparat – Atyraýda qazaq kúresinen erler men áıelder arasynda el chempıonaty aıaqtaldy, dep habarlaıdy QazAqparat.

Bul chempıonatty Mádenıet jáne sport mınıstrliginiń Sport jáne dene shynyqtyrý isteri komıteti men «Qazaq kuresi» assotsıatsııasy, Atyraý oblysynyń dene shynyqtyrý jáne sport basqarmasy uıymdastyrdy.

Jarysqa elimizdiń barlyq oblysy men Astana, Almaty men Shymkent qalasynan 363 balýan qatysty.

Básekede erler arasynda 55-100 keli jáne odan joǵary, al, áıelder arasynda 48-77 keli jáne odan joǵary salmaqta myqtylar anyqtaldy.

«Aldaǵy qarasha aıynyń 4-6 kúnderi Astana qalasynda úzdikterdiń úzdigi baq synaıtyn saıys ótedi. Sol jarysta ár salmaq boıynsha reıtıngte segizdikke engen balýandar beldesedi. Jeńimpaz bolǵan balýandar álem chemıonatyna joldama alady», -deıdi qazaq kúresinen aǵa jattyqtyrýshy Aıbek Serǵazıev.

Óńirlik kommýnıkatsııalar qyzmetiniń málimetinshe, el chempıonatynda atyraýlyq 8 balýan reıtıngtegi segizdikke engen.

Olar – Beket Júnis (55 keli), Jánibek Telman (60 keli), Bekarys Muratuly (66 keli), Nurbolat Іzimǵalıev (74 keli), Ádilet Qulshym (74 keli), Saǵat Ǵazımov (90 keli), Rýslan Іzǵalıev (100 keli), Suńǵat Zakarııaev (100 keli).

Al, qazaq kúresinen el chempıonatynda atyraýlyq arýlar 1 altyn, 2 qola medaldy ıelendi. Atap aıtqanda, 48 keli salmaqta Aıgerim Tóreǵajına 1 orynǵa, osy salmaqta Hamarııa Ámirǵalıeva men 77 keliden joǵary salmaqta beldesken Elmıra Samıǵollaeva 3 orynǵa ıe boldy.

Eske sala ketelik, buǵan deıin Atyraýda qazaq kúresinen el chempıonaty ótip jatqanyn jazǵan edik.