Atyraýda qazaq álipbıin latyn qarpine kóshirýdiń ózekti máselesi talqylanýda

ATYRAÝ. QazAqparat - Atyraýda Elbasy Nursultan Ábishuly Nazarbaevtyń «Bolashaqqa baǵdar: rýhanı jańǵyrý» maqalasy aıasynda «Qazaq jazýyn latyn álipbıine kóshirý: jahandaný jaǵdaıyndaǵy memlekettik tildiń damýy» atty halyqaralyq ǵylymı-praktıkalyq konferentsııa ótýde, dep habarlaıdy QazAqparat tilshisi.

Atyraý oblysynyń ákimdigi men H.Dosmuhamedov atyndaǵy Atyraý memlekettik ýnıversıtetiniń uıymdastyrýymen ótken konferentsııa jumysyna Qyrǵyzstan, Ózbekstan, Túrkııa, Ázerbaıjan, Reseı elderinen kelgen ǵalymdar, oqytýshylar men stýdentter qatysty.

QR Mádenıet jáne sport mınıstrligi Tilderdi damytý jáne qoǵamdyq-saıası jumystar komıtetiniń tóraǵasy Qýat Borash atqarylyp jatqan sharalar jaıynda baıandama jasady.

«Latyn grafıkasyna negizdelgen qazaq álipbıi jasaldy. Endi 2025 jylǵa deıin kezeń kezeńmen kóshý josparlanyp otyr. Maýsym aıynyń sońynda alfavıttiń tujyrymdamasyn bekitip, qyrkúıekte Ulttyq komıssııaǵa usynamyz. Sodan keıin latyn qarpine oqý-ádistemelik jaǵynan kóshý bastalady», - dedi Qýat Borash.

Konferentsııaǵa qatysqan Atyraý oblysynyń ákimi Nurlan Noǵaev fılologtar men til mamandarynyń aldaǵy jumystaryna tabys tiledi.

«Latyn qarpine kóshý árqaısymyz úshin mańyzdy, bul tarıhı oqıǵa. Búgingi shara ǵalymdardyń pikir almasýlaryna, osy taqyryp boıynsha teorııalyq, tájirıbelik máselelerdi sheshýge baǵyttalǵan. Latyn álipbıine kóshý memlekettik tilimizge de oń yqpal etedi, qazaq tiliniń damýyna septigin tıgizedi, ony zamanaýı ǵylym men tehnıkanyń tiline aınaldyrady. Konferentsııada talqylanǵan mańyzdy máseleler boıynsha qabyldanǵan sheshimder tıimdi bolaryna senim bildiremin», -dep atap ótti Nurlan Noǵaev.

Atalǵan shara aıasynda Abaı atyndaǵy Qazaq ulttyq pedagogıkalyq ýnıversıtetiniń professory, sotsıolıngvıst, fılologııa ǵylymynyń doktory, professor Baqytjan Hasanuly, A.Baıtursynov atyndaǵy Til bilimi ınstıtýtynyń dırektory Erden Qajybek, Sh.Shaıahmetov atyndaǵy tilderdi damytý respýblıkalyq úılestirý-ádistemelik ortalyǵynyń dırektory, fılologııa ǵylymdarynyń kandıdaty Erbol Tileshov, Túrki tildes memleketter yntymaqtastyq Keńesi bas hatshysynyń orynbasary Omer Kodjamandar jáne basqa da tájirıbeli mamandar taqyryptyq baıandamalaryn oqydy.

Sondaı-aq, májiliste qazaq jazýyn latyn álipbıine kóshirý máselesi, ondaǵy alǵysharttar men tetikterdi, til mádenıetin zerdeleý jumystary talqylandy.

Sonymen qatar, konferentsııa aıasynda aımaq basshysy Nurlan Noǵaev pen ýnıversıtet rektory Abzal Taltenov sotsıolıngvıst, fılologııa ǵylymynyń doktory, professor, Atyraý ólkesiniń týmasy Baqytjan Hasanulyn mereıli 80 jasymen quttyqtap, ıyǵyna shapan jaýyp, mereıger ıesine daryndy tulǵalarǵa arnalǵan altyn tósbelgisin tabystady.

Aıta keteıik, konferentsııa búgin «Jahandaný kezeńindegi álemdik kommýnıkatsııadaǵy latyn grafıkasynyń róli», «Qazaq jazýyn latyn álipbıine kóshirý, álemdik tájirıbe jáne ǵylymı-ádisnamalyq ustanymdar», «Rýhanı jańǵyrý:Ulttyq bilim júıesindegi ınnovatsııalyq ádisteme» taqyryptarynda 3 sektsııa aıasynda ótip jatyr.