Atyraýda qaıtys bolǵan sarbaz menıngokokk ınfektsııasyn juqtyrmaǵan - dárigerler

ATYRAÝ. QazAqparat - Atyraýda qaıtys bolǵan áskerı qyzmetker menıngokokty ınfektsııamen aýyrmaǵan, dep habarlaıdy QazAqparat tilshisi.

«Pavlodar oblysynyń Aqsý qalasynan shaqyrylǵan 19 jastaǵy merzimdi áskerı qyzmetshi týberkýlez menıngıtinen qaıtys bolǵan. Áskerı qyzmetkerdiń aýrýy menıngokokty ınfektsııa sekildi juqpaly aýrýlar qataryna jatpaıdy, aýa jáne tamshylar arqyly juqpaıdy. Naýqastyń ókpesin flıýorografııadan ótkizý kezinde onyń ókpesi taza bolyp shyqty, sondyqtan da onymen birge qyzmet etip júrgenderge juqpaǵan», - dep málimdedi Atyraý oblystyq klınıkalyq aýrýhananyń bas dárigeri Saın Shomırov.

Onyń sózine qaraǵanda, menıngokokk ınfektsııasy óte qarqyndy ári jyldam ótedi, al týberkýlez menıngıtinen mı men julyn suıyqtyǵynyń naýqastanýy sozylmaly túrde bolady.

Eske sala keteıik, Atyraýda týberkýlezge qarsy kúres dıspanserinde emdelip jatqan sarbaz qaıtys bolǵandyǵy habarlanǵan edi.