Atyraýda kásipkerlikti damytýǵa 900, turǵyn úımen qamtýǵa 44 mlrd teńge bólindi
Búgin Atyraý oblysynyń ákimi Serik Shápkenov pen «Báıterek» UBH» AQ basqarma tóraǵasy Qanat Sharlapaev kásipkerlikti damytý, turǵyn úımen qamtý máselelerin talqylady.
«Elimizdiń eń mańyzdy strategııalyq maqsatynyń biri – kásipkerlikti qarjylaı jáne qarjylaı emes qoldaý, bıznes-klımatty únemi jaqsartý. Osy oraıda Atyraý oblysyn damytýǵa baǵyttalǵan jobalardy qoldaýǵa árkez daıynbyz. Oblysta holdıngpen birlese atqarylyp jatqan ıgi ister bar. Aldaǵy ýaqytta birneshe jobany júzege asyrý kózdelip otyr», -dedi Serik Shápkenov.
Jıynda Atyraý oblysynyń damý keleshegi, ınvestıtsııalyq yntymaqtastyq múmkindikteri, holdıngtiń qoldaýymen birlesken jobalardy iske asyrý jaıy talqylandy. Onyń ishinde «KPI Inc.» JShS-niń munaı klasterin odan ári damytý, kásipkerlikti qoldaý baǵytynda sýbsıdııalaý úshin qarjy bólý, agroónerkásipti damytý, turǵyn úı keshenin salý máseleleri bar.
«Báıterek» UBH» AQ basqarma tóraǵasy Qanat Sharlapaevtyń aıtýynsha, «Atyraý oblysynyń áleýmettik-ekonomıkalyq 2023-2025 jyldarǵa arnalǵan keshendi damý josparyna» sáıkes, kásipkerlikti damytýǵa 900 mlrd teńge bólgen. Al, turǵyndardy turǵyn úımen qamtýǵa bólingen qarjy kólemi 44 mlrd teńgeden asady.
«Atyraý oblysyndaǵy shaǵyn jáne orta bıznesti qoldaýǵa erekshe kóńil bólip otyrmyz. Al, agroónerkásipti damytý sharalaryn qoldaýǵa qajetti qarjyny jergilikti atqarýshy organ men agrarlyq nesıe korporatsııasy birlese bólip, ortaq jaýapkershilik alý qajettigin atap ótkim keledi. Óńirdegi kásipkerlikti damytý baǵytyndaǵy jobalar áli jalǵasady», - dedi Qanat Sharlapaev.
Eske sala ketelik, buǵan deıin Atyraý prokýrorlary 365 kásipkerdiń quqyǵyn qorǵap, 11 mln teńgesin qaıtarǵanyn jazǵan edik.