Atyraýda Qashaǵan ken ornynyń gazyn óńdeıtin zaýyt salynady

ATYRAÝ. QazAqparat –Atyraý oblysynda Kaspıı teńiziniń qazaqstandyq sektoryndaǵyQashaǵan ken ornynyń gazyn óńdeıtin zaýyt salynady. Bul týraly joba ınvestory «GPCInvestment» JShS kompanııasynyń ókilderi qoǵamdyq tyńdaý kezinde málim etti, dep habarlaıdy QazAqparat.

Qashaǵan gaz óńdeý zaýytynyń qurylys jobasy shıki gazdy jaǵýdyń jáne keri aıdaýdyń ornyna ony qaıta óńdeýdiń ulttyq baǵdarlamasy aıasynda iske asyrylady. Jańa zaýyt jylyna 1 mlrd tekshe metrge deıin gaz óńdeıtin bolady. Sondaı-aq, bul Qashaǵan ken ornynda munaı óndirýdi 12 mln tonnaǵa arttyrýǵa múmkindik beredi. Gaz óńdeý zaýytynyń qurylysyn QR Úkimeti bekitken. Oǵan ınvestor retinde «GPC Investment» JShS kompanııasy tartylǵan. Budan basqa jobany iske asyrý úshin jetekshi otandyq jáne sheteldik mamandar tartylady. Jobany qarjylandyrý ınvestordyń óz esebinen jáne qarjy ınstıtýttarynyń qarajatyn tartý esebinen júzege asyrylatyn bolady.

«Jobalanǵan jumystar ýchaskesi Maqat aýdanynyń aýmaǵynda eldi mekenderden alys mańda bolady. Zaýyt Atyraý qalasynan 60 km, al aýdan ortalyǵy Maqat kentinen soltústik-shyǵysqa qaraı 63 km qashyqtyqta ornalasqan. Qurylys kezeńinde, keıin paıdalaný

kezeńinde zııandy zattardyń shyǵaryndylary, qaldyqtardyń mólsheri barlyq sanıtarlyq normalarǵa sáıkes keletin ruqsat etilgen mánder sheginde bolmaq. Qurylys qunyna áser

etkenine qaramastan, atmosferaǵa zııandy shyǵaryndylardy azaıtý boıynsha eń ozyq

tehnologııalardy paıdalaný týraly sheshim qabyldandy. Atmosferaǵa kúkirtti angıdrıd

sııaqty zııandy gazdyń shyǵarylýyn boldyrmaýǵa múmkindik beretin SCOT tehnologııasy qoldanyldy. Sondaı-aq, biz BASF jáne Dow Chemical sııaqty tanymal álemdik fırmalardyń ozyq tehnologııalaryn paıdalanýdy kózdedik. Jabyq túrdegi alaý qondyrǵysy qoldanylady. Jabyq alaý qondyrǵysynyń korpýsy shýdan, jelden, jylý radıatsııasynan, kórinetin ottan qorǵaýǵa arnalǵan», – deıdi jobanyń tehnıkalyq jetekshisi Bolat Saqtaǵanov.

Jobaǵa sý qoldanystaǵy «Astrahan-Mańǵyshlaq» sý taratqyshynan alynady.

Bıoresýrstardy únemdeý úshin zaýytta tazalaýdan keıin sýdy qaıta paıdalana otyryp, turmystyq kárizdiń jabyq jerasty jelisin salý josparlanýda. Óndiristik-jańbyr kárizderiniń kollektorlary boıynsha barlyq óndiristik jáne jańbyr aǵyndary jabyq túrdegi saqtaý rezervýaryna túsedi. Saqtaý rezervýarynan sorǵyshtar óndiristik-jańbyr aǵynyn tazartý blogyna beriledi. Tazalaýdan keıin qajetti sapaǵa deıin tazartylǵan óndiristik-jańbyr aǵyny kásiporynnyń óndiristik sýmen jabdyqtaý júıesinde qaıta paıdalanýǵa jiberiledi.

Gaz óńdeý zaýytynyń qurylysynda 2500-ge deıin, keıin paıdalaný kezeńinde 600-ge jýyq turaqty jumys orny ashylmaq.