Atyraýda qarjy pıramıdasy 35 adamǵa 49 mln teńge zalal keltirgen
Qarjylyq monıtorıng agenttigi Atyraý oblysy boıynsha ekonomıkalyq tergep-tekserý departamentinde «QazHome» qarjy pıramıdasyn uıymdastyrý deregi anyqtaldy.
«Ayraýda qarjy pıramıdasyn qurǵan tulǵalar áshkerelendi. Olar «QazHome» tutyný kooperatıvi quryp, jeke jáne zańdy tulǵalardyń aqshasyn nemese ózge de múlkin tartýdan, keıbir qatysýshylardyń aktıvterin qaıta bólýden, basqalardyń jarnalary esebinen kiris alý qyzmetin uıymdastyrǵan. Atalǵan qylmystyq isti Atyraý oblysy boıynsha ekonomıkalyq tergep-tekserý departamentiniń qyzmetkerleri tergep, tekserdi. Tergeý barysynda anyqtalǵandaı, kooperatıv qyzmetine 296 salymshy tartylǵan. Salymshylardyń tek 35-i ǵana shaǵymdanyp, aryz jazdy. Aryzdar boıynsha zalal somasy 49 mln teńgeden asady», -dep habarlady agenttiktiń aspasóz qyzmeti.
Qazirgi ýaqytta qylmystyq is sotqa jiberildi.
Eske sala ketelik, budan buryn Atyraýda qarjy pıramıdasyn qurý kúdigimen eki kompanııaǵa qatysty tergeý júrip jatqanyn habarlaǵan bolatynbyz.
Atyraý oblysy boıynsha Ekonomıkalyq tergep-tekserý departamentiniń shtab bastyǵy Bekbolat Ánesovtiń dóńgelek ústelde málim etkenindeı, jyl basynan beri qarjy pıramıdasyn qurýǵa baılanysty 3 derek tirkelgen.
«Turǵyndardy aldap-arbaýdyń aldyn alý úshin monıtorıng júrgiziledi. Monıtorıngtiń nátıjesinde bıylǵy bes aıda 3 derek áshkerelendi. Qazir «Chia Tai Tianging» jáne «InCruises» JShS-ǵa qatysty qarjylyq (ınvestıtsııalyq) pıramıdany qurý jáne oǵan basshylyq etý deregimen qozǵalǵan qylmystyq is tergelip jatyr», - dep habarlady Bekbolat Ánesov.