Atyraýda karantın kezinde jıyn-toı ótkizý tyıylmaı otyr

ATYRAÝ. QazAqparat –Atyraý oblysynda karantındik rejım shekteýlerin buzǵan 1042 derek tirkeldi. Solardyń arasynda kóp adamnyń basyn qosyp quda shaqyryp, kelin túsirgender anyqtaldy, dep habarlaıdy QazAqparat.

Oblystyq polıtsııa departamentiniń bastyǵy, polıtsııa polkovnıgi Qamza Úmbetqalıevtiń málimetinshe, Atyraý qalasynda 24 shildede úıinde kóp adamdy jınap, jıyn-toı, januıalyq shara ótkizgen 5 otbasy anyqtalǵan. Sol kúni saǵat 19:00 shamasynda Balaýsa yqshamaýdanynda 80 adam qatysqan qudalyq, al, saǵat 23:10-da Tasqala aýylynda bir otbasynyń kelin túsirý toıy áshkerelengen.

«Sondaı-aq, tekserý kezinde belgilengen shekteýlerdi oryndamaǵan birneshe dúken mobıldik toptardyń nazaryna ilikti. Máselen, Vokzal mańy-5 yqshamaýdanynda ornalasqan «Alkomarket», Tomarly aýylyndaǵy «Farıza» dúkeni saǵat 21:00 keıin jumys istep tursa, Bereke kentindegi, Shırına, Aq Jaıyq eldi mekenderindegi azyq-túlik dúkenderiniń satýshylary tutynýshylarǵa medıtsınalyq maskasyz, qolǵapsyz qyzmet kórsetken.

Polıtseıler reıdtik shara kezinde Balyqshy kentinde kólik jýý ornyn, Vokzal mańy-3-A yqshamaýdanynda «Kýry grıl» dúńgirsheginiń, Baımuhanov kóshesinde «Donerstan» qoǵamdyq tamaqtaný ornynyń karantın talaptaryn buzǵanyn anyqtady» -dedi departament bastyǵy Qamza Úmbetqalıev.

Onyń aıtýynsha, karantın rejımin buzýdyń barlyq deregi boıynsha jınaqtalǵan is-qujattar Atyraý qalalyq taýarlar men qyzmetterdiń sapasy men qaýipsizdigin baqylaý basqarmasyna joldandy.

Eske sala ketelik, buǵan deıin Atyraý oblysynda karantın 3 tamyzǵa deıin sozylǵan edi.