Atyraýda KamAZ-dyń astyna túsken jigit ózine qol salmaq bolǵan
Oblystyq Polıtsııa departamentiniń baspasóz qyzmetinen málim etkendeı, oqıǵa 25 shilde bolǵan.
«Sol kúni jergilikti ýaqytpen saǵat 19:00 shamasynda 34 jastaǵy jigit óz-ózine qol salý maqsatynda pyshaqpen moıynyn kesip, jaraqat salǵan. Ony jumystan úıine qaıtyp kele jatqan polıtsııa qyzmetkerleri toqtatýǵa oqtalǵan. Alaıda, sol kezde polıtsııa qyzmetkerlerine baǵynbaǵan jigit jolda júrip bara jatqan KamAZ avtokóliginiń astyna túsken», - dep málim etti departamenttiń baspasóz qyzmetinen.
Oblystyq Densaýlyq saqtaý basqarmasy baspasóz qyzmetiniń málimetinshe, júk kóliginiń astyna túsken jigit týraly habar jedel járdem qyzmetine saǵat 19:13-te tústi. Qońyraýdy jolaı ótip bara jatqan turǵyn shalǵan.
Jol-kólik oqıǵasy bolǵan Atyraý qalasyndaǵy «Kaspıı» aıaldamasyna №12 jedel járdem brıgadasy barǵan. Jedel járdem brıgadasynyń qyzmetkerleri qaraý kezinde jigittiń jaǵdaıy ortasha aýyr kúıde ekenin anyqtaǵan.
«Dárigerler 34 jastaǵy jigittiń tizesiniń ústi, oń jaq jambas súıegi synǵanyn anyqtady. Moınynda pyshaqpen kesilgen birneshe jaraqaty bar. Qazir naýqas dárigerlerdiń baqylaýyna alyndy», - dep habarlady basqarmanyń baspasóz qyzmetinen.
Al polıtsııa qyzmetkerleri atalǵan oqıǵaǵa qatysty QR Qylmystyq kodeksiniń 105-babymen qylmystyq isti tergep jatyr.
Eske sala ketelik, Atyraýda jol ortasynda júrgen jigit KamAZ kóliginiń astyna túskenin jazǵan edik.
Vıdeodan alyn ǵ an kadr