Atyraýda qala kúnine oraı skeıt-saıabaǵy ashylady
Alǵashqy skeıt-saıabaq qala kúnine oraı salynǵaly otyr. Atyraý qalasynyń ákimi Álımuhammed Quttymuratuly ınvestorlarmen qurylys bolatyn alańda keńes ótkizdi.
Jańa sport nysany Avangard yqshamaýdany men Turǵyndar qalashyǵy yqshamaýdanyn qosatyn kópirdiń astynda ornalasady.
Aıta keteıik, skeıt-saıabaǵynyń orny kezdeısoq tańdalmaǵan. Sebebi, saıabaqtyń qasynda Retro-saıabaǵy, Jaıyq ózeni jáne jáne Atyraýdyń tanymal kórnekti jerleriniń biri jaıaý júrginshiler kópiri ornalasqan.
«Skeıt-saıabaǵy» balalar men jastardyń bos ýaqytyn ótkizetin jańa orynǵa aınalatynyna, sondaı-aq, skeıtbordıng sport túrin damytýǵa bastama bolatyny anyq. Qalalyq sport bólimine skeıt-saıabaǵyn salýǵa ótinish turǵyndar tarapynan burynnan túsip keledi. Qurylys kompanııalarynyń biri jańa sport nysanynyń qurylysy boıynsha jobaǵa ınvestıtsııa salýǵa nıet bildirgen bolatyn.
Biz «Týǵan jerge taǵzym» jobasy boıynsha qoldaıtyn jáne týǵan qalasyna kómektesýge daıyn kásipkerler bar ekenine qýanyshtymyz«, - deıdi Álımuhammed Quttymuratuly.
Aıta keteıik, qazirgi ýaqytta skeıt-saıabaǵy qurylysyna bólingen alańdy tazalaý jumystary júrgizilýde. Alań tolyǵymen qoqys pen aramshópterden tazartyldy. Saıabaqtyń qurylysy boıynsha jumystar qazan aıynyń basynda aıaqtalady dep josparlanýda.
»Biz skeıt saıabaǵyn barynsha qaýipsiz jáne jaraqat alý jaǵdaıy bolmaý úshin qolaıly etýge tyrysyp jatyrmyz. Balalar úshin tóseme joldar rezeńke jabyndymen, al jasóspirimder men jastar úshin ol betondy bolady. Sondaı-aq, biz skeıt-saıabaq aýmaǵyn abattandyrý jáne kógaldandyrýǵa nıettemiz«, deıdi jobanyń ınvestory bolyp tabylatyn kompanııa dırektory Abaı Hamıdýlla.
Óz kezeginde qala basshysy ınvestorǵa qalalyqtardyń barynsha jaıly demalýy úshin, oryndalatyn jumystyń sapasy jaqsy bolýyn, sondaı-aq, nysandy ýaqtyly aıaqtaýdy tapsyrdy.