Atyraýda «Іsker ana» jobasy aıasynda 46 ana marapattaldy
«Іsker ana» jobasynyń alǵashqy granttar baıqaýynda osy jylǵy shilde aıynyń 15-nen tamyz aıynyń 15-ne deıin oqýdan ótken 250 anaǵa jańa múmkindikter berildi. Eń qyzyǵy, 78 áıeldiń ótinishi elektrondyq nusqada kelgen. Komıssııa sheshimimen olardyń arasynda 46 qatysýshy tańdaldy. Olarǵa kásipterimen aınalysýǵa arnalǵan qajet bolatyn quraldar berildi.
Marapattaý rásimine qatysqan oblystyq ákimdiktiń ishki saıasat basqarmasynyń basshysy Jasulan Bısembaevtyń aıtýynsha, jyl qorytyndysy boıynsha jobanyń úzdik qatysýshylaryna yntalandyrý syılyqtaryn berý josparlanyp otyr.
«Baǵdarlama sharttaryna sáıkes, oqýdan ótken, kásipkerlikpen aınalysýǵa nıet bildirgen jáne arnaıy bıznes josparlary bar kelinshekterge aqshalaı túrde grant berý qarastyrylǵan. Úı sharýasyndaǵy áıelder ǵalamtordy paıdalana otyryp, óz kásibimen aınalysýy úshin jumys istep jatyrmyz. Mysaly, sáıkes mamandyqty ıelenip, ártúrli saýda alańdary arqyly kondıterlik ónimderdi satyp, tabys taýyp otyrǵan áıel adamdar bar. Tigin tigip, toqyma toqyp, ózge de qyzmetterin usynyp otyr. Múmkin, kóp aqsha emes shyǵar, soǵan qaramastan jaman emes» , - dedi J. Bısembaev.
«Іsker ana» jobasy aıasynda qatysýshy kelinshekter 10 mamandyq boıynsha eki aptalyq kýrstardan ótedi. Olar kásipkerlik, psıhologııa jáne marketıng boıynsha mamandardyń dáristerine qatysady. Marapattalýshylardyń arasynda búgin aspazdar, bet árleýshiler, massaj jasaýshylar, shashtarazdar, tiginshiler, manıkıýr mamandary boldy.