Atyraýda iri úsh kompanııa jumysshylarynyń jalaqysyn kóterý máselesi qaraldy

ATYRAÝ. QazAqparat – Atyraýda áleýmettik áriptestik pen eńbek qatynastaryn retteý jónindegi oblystyq úshjaqty komıssııanyń otyrysy ótti. Jıynda «Embimunaıgaz», «Atyraý-Jaryq» AQ men «KPI Inc.» JShS-niń merdiger kompanııalaryndaǵy jumysshylarynyń jalaqy kóterý týraly ótinishi qaraldy, dep QazAqparat.

Atyraý oblystyq memlekettik eńbek ınspektsııasy basqarmasynyń basshysy Igilik Áýbákirovtiń aıtýynsha, jalaqynyń tómendigi jumysshylardyń renishin týdyrǵan.

«Máselen, «Embimunaıgaz» AQ-nyń nysandaryn kúzetetin «KZ Projection Group» JShS-de 500-den astam adam jumys isteıdi. Kúzetshilerdiń aılyǵy – 84 000 teńge. Tek bıyl 10%-ǵa ǵana kóterilgen. Al, «AMÓZ» JShS-ǵa kólikti usyný qyzmetin júzege asyratyn «Gold Sunray» JShS jumysshylary osyndaı máselemen oblystyq ákimdikke júgindi. Jalaqy byltyrǵy 1 shildede 10%, bıylǵy 1 qańtarda taǵy 10% ósti. Arnaıy avtokólik júrgizýshileri men slesarlyq topqa 20 myń teńge mólsherinde aı saıynǵy ústemeaqy belgilendi. Olar vedomstvoaralyq shtabta eńbek qatynastarynyń problemalyq máselelerin sheshýdi qaraýdy, «Samuryq-Qazyna» AQ-ǵa eńbekaqy tóleý qoryn arttyrý týraly kelisimshartqa ózgerister engizý jóninde usynystar berýdi suraıdy», -dedi Igilik Áýbákirov.

Al oblystyq kásipodaqtar birlestigi tóraǵasynyń orynbasary Edil Uzaqbaı «Kazakhstan Petrochemical Industries Inc.» JShS-niń merdiger kompanııasyndaǵy qyzmetkerlerdiń máselesin qozǵady.

«Oblystyq memlekettik eńbek ınspektsııasyna «VG Service» JShS-niń qyzmetkerleri tıisti ótinishpen júgindi. Merdiger mekeme Astana qalasynda ornalasqandyqtan, is Astana qalalyq orta sapasy jáne baqylaý basqarmasyna joldandy. Biraq astanalyq basqarma Prezıdenttiń Jarlyǵymen shaǵyn kásipkerlik sýbektilerin tekserýge moratorıı jarııalanýyna baılanysty jumysshylardyń ótinishi boıynsha tekserýdi tirkeý men júrgizý múmkin emes dep jaýap berdi», -dep málim etti Edil Uzaqbaı.

Komıssııa otyrysynda «Atyraý-Jaryq» AQ-daǵy eki másele qaraldy. Biri – jumysshylardyń áleýmettik jaǵdaıy, ekinshisi – qaýipsizdik erejeleri.

«Bizdiń basty maqsatymyz – qyzmetkerlerdiń eńbek quqyǵyn qorǵaý. Bul mekemede birneshe ret jazataıym oqıǵa tirkeldi. Sol jumysshylar sheteldik kompanııada jumys istese, tehnıkalyq qaýipsizdikti tolyq saqtaıdy. Al, bizde nege kersinshe? Óıtkeni, talap qoıylmaıdy. Sonyń saldarynan adamnyń densaýlyǵyna zııan keledi. Ómirine qaýip tónedi. Biz jumysshylardyń qaýipsizdigin birinshi orynǵa qoıýymyz kerek», -dedi Serik Shápkenov.

Eske sala ketelik, budan buryn Atyraý oblysynda 337 jumysshynyń 59 mln teńge jalaqy bereshegi ótelgen edi.