Atyraýda ınklıýzıvti teatr ashylady
«Biz de adambyz» qorynyń basshysy Gúlnaz Qosmurzıevanyń aıtýynsha, erekshe qajettiligi bar adamdarǵa art-terapııasyn júrgizý úshin ınklıýzıvti teatr ashý jobasy qolǵa alynǵan.
«Inklıýzıvti teatr – múmkindigi shekteýli jandardyń qatysýymen ótetin sahnalyq áreket. Mundaı teatrdy qurý ıdeıasy qor rezıdentteri arasynda saýalnama júrgizilip, Atyraý qalasynda múmkindigi shekteýli jandardyń ýaqytyn ótkizýge qolaıly oryn joq degen qorytyndy shyǵarǵannan keıin týyndady. Tıisti jaǵdaı jasalmasa, múgedek adamdardy áleýmettendirý múmkin emes. Ideıa týyndaǵannan keıin joba daıyndap, qarjylaı kómek kórsetetin demeýshilerdiń qoldaýymen alǵashqy qadamǵa kiristik. Inklıýzıvti teatrdyń kómegimen múgedek jandarǵa áleýmettik ońaltý júrgizip, olardyń da qoǵamnyń belsendi múshesi retindegi beınesin qalyptastyrýdy maqsat etip otyrmyz», - deıdi Gúlnaz Qosmurzıeva.
Jańa jobanyń úılestirýshisi – arba ústindegi bıden Qazaqstannyń birneshe márte jeńimpazy Esbolat Balabaev. Onyń aıtýyna qaraǵanda, ınklıýzıvti teatrda vokal, bı, akterlik sheberlik, sóıleýdi túzeý jáne damytý (sóıleý sheberligi) baǵytynda arnaıy úıirme ashylady. Teatr ártisteri jyl sońyna deıin 2 sahnalyq qoıylym men 2 shyǵarmashylyq kesh uıymdastyrýdy kózdep otyr.
«Ózimniń tájirıbeme súıenip, shyǵarmashylyq jumystyń teris emotsııalarmen, oqshaýlanýmen, sondaı-aq depressııamen kúresýge kómektesetinin bilemin. Sol sebepten, osy jobanyń júzege asyrylatyn sátin taǵatsyzdana kútip júrmin. Erekshe ártisterimiz shyǵarmashylyq arqyly ózin túsiný, ózgelermen baılanys ornatý sekildi qabiletin jaqsartady. Kóbinese múgedektigi bar adamdar túrli stereotıpke erip, jańa áleýmettik baılanystar ornatpaıdy. Burynǵy tanystarymen baılanysyn úzedi. Bul qoǵam men adamdardyń ózderi jasaıtyn jasandy kedergiler dep oılaımyn. Bizdiń maqsatymyz – osyndaı kedergilerdi joıyp, erekshe jandardyń shyǵarmashylyq áleýetin damyta alatyn orta qalyptastyrý, teatrdy terapııanyń bir túrine aınaldyrý», deıdi Esbolat Balabaev.
Eske sala ketelik, buǵan deıin Atyraýdaǵy HQKO-da múmkindigi shekteýli 25 adam jumys isteıtinin jazǵan bolatynbyz.