Atyraýda Inder aýdanynyń ákimine sógis berý usynyldy
Atyraý oblysynyń ákimi Serik Shápkenovtiń qatysýymen oblystyq máslıhattaǵy Amanat partııasy depýtattyq fraktsııasynyń kezekti otyrysy ótti. Onda partııanyń «Ózgerister joly: Ár azamatqa laıyqty ómir!» atty saılaýaldy baǵdarlamasynyń 2021 jyly oryndalmaǵan jáne 2022 jyly oryndalmaýy qaýpi bar is-sharalar talqylandy.
Amanat partııasy Atyraý oblystyq fılıalynyń atqarýshy hatshysy Abdolla Idresovtiń málimetinshe, ótken jyly partııanyń saılaýaldy baǵdarlamasynyń 716 ındıkatory oryndalýy tıis bolsa, onyń 12-si júzege aspaǵan. Oryndalmaǵan is-sharalardyń basym bóligi Inder aýdanynda tirkelgen.
Máselen, qatty turmystyq qaldyqtardy suryptaý keshenin ornatý, Esbol aýylyndaǵy 320 oryndyq mektep qurylysyn aıaqtaý, «Bolashaq» shaǵynaýdanyna jol, Kóktoǵaı aýylyna 90 oryndyq balabaqsha, B.Nysanbaev atyndaǵy orta mektepke 120 oryndyq japsarjaı qurylysyn salý jumystary keshiktirilgen.
«Qatty turmystyq qaldyqtardy suryptaý keshenin iske qosý úshin elektr jelisin júrgizý, polıgondy qorshaý qajet. «Bolashaq» shaǵynaýdanyndaǵy jol salý úshin jobalaý-smetalyq qujaty daıyn bolmaǵan. Soǵan baılanysty qarjy bólinbeı, atalǵan jumys oryndalǵan joq. Esbol aýylyndaǵy mekteptiń qurylysyna naryqtaǵy materıaldyń baǵasy ósýine baılanysty quny qaıta qaralyp jatyr. Іs-sharalardyń barlyǵy osyndaı máselelerdiń týyndaýyna baılanysty keıinge qaldyryldy. Sizderden atalǵan sharalardy 2024 jylǵa deıin sozýdy usynamyn», - deıdi Inder aýdandyq máslıhatyndaǵy depýtattyq fraktsııasynyń jetekshisi Janaı Amantýrlın.
Osyǵan oraı oblys ákimi Srik Shápkenov turǵyndar aldynda bergen ýádeni oryndaýdyń mańyzyn eske saldy.
«Baǵdarlamany jasaqtaý kezinde qatelikter ketken bolsa, tıisti ózgeris engizý qajet. Turǵyndar aldynda bergen ýádeni túrli syltaýmen jyly jaýyp qoıýǵa bolmaıdy. Júzege asyrylmaı turǵan jobalardy áli de talqylap, sheshim shyǵarý qajet. Naqty ári keshendi jospar jasaqtap, iske asyrý kerek», -dedi Serik Shápkenov.
2021 jyly saılaýaldy baǵdarlamanyń tolyq oryndalýyn qamtamasyz etpegen Inder aýdanynyń ákimine sógis jarııalaý týraly oblys ákimine usynys jasaldy.