Atyraýda halyqty jumyspen qamtý baǵdarlamasy oıdaǵydaı júzege aspaı otyr

ATYRAÝ. QazAqparat – Bıyl Atyraý oblysynda«Eńbek» baǵdarlamasynyń arqasynda 23 myńnan astam adam jumyspen qamtylady, dep habarlaıdy QazAqparat.

Bul týraly oblys ákimi Mahambet Dosmuhambetovtiń tóraǵalyǵymen ótken jıynda belgili boldy. Onda «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasynyń oryndalý barysy men eńbekaqy bereshegine jol bermeý, sondaı-aq, elektrondyq eńbek sharttary talqylandy.

Óńirde byltyr atalǵan baǵdarlama sheńberinde 28 344 adam jumyspen qamtylyp, 5 mlrd teńge qarjy ıgerilgen. Josparlanǵan sharalar tolyǵymen oryndalǵan. Bıyl baǵdarlama aıasynda 23 566 adamdy jumyspen qamtý kózdelip otyr.

«Jyl basynan beri jumyspen qamtý ortalyqtaryna habarlasqan 11 410 adamnyń ishinen 6 217-i ıaǵnı 54,5 paıyzy jumyspen qamtyldy. Qazir jumyssyzdar sany 9 805 adamdy qurap otyr», - dedi oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Serik Qamıdolla.

Mekemeler usynǵan turaqty jumys ornyna 2 344 adam ornalastyrylyp, jospar 19,5% ǵana oryndalǵan. Budan da tómen kórsetkishter Atyraý qalasynda (9,8%), Jylyoı jáne Isataı aýdandarynda (14,8%) baıqalǵan.

Oblys ákimi Mahambet Dosmuhambetov memlekettik baǵdarlama aıasynda júzege asýy tıis jumystardy óz deńgeıinde uıymdastyra almaı otyrǵan aýdan ákimderin synǵa aldy.

«Jumystaryńyzda kemshilik kóp. Bárin karantınge silteısizder. Maǵan jospardy qaı ýaqytta tolyq oryndaıtyndaryńyz kerek. Kelesi aıda júktelgen mindetti qanshalyqty oryndap, kórsetkishterdi jaqsarta alasyzdar? Naqty josparlaryńyzdy aıtyńyzdar. Karantındi syltaýratýdy qoıý kerek. Jumys isteıtinderge árdaıym jol ashyq. Tótenshe jaǵdaı, tipti karantın kezinde de jumys isteýge arnaıy ruqsat berdik. Oblystyq arnaıy shtab sol úshin kúni-túni jumys istedi», - dedi aımaq basshysy.

Sondaı-aq, oblys ákimi quzyrly organdarmen birlesip, mekemeler men kásiporyndarda eńbekaqylardyń ýaqytyly jáne tolyq kólemde tólenýine monıtorıng jasaýdy jalǵastyrýdy, halyqqa túsindirý jumystaryn júrgizip, áleýmettik álsiz toptyń máselelerin tereń zerdelep, taldaý jasaýdy tapsyrdy.

Budan buryn Atyraýda «Dıplommen aýylǵa» jobasymen 40-qa jýyq mamannyń aýylǵa attanatynyn habarlaǵan edik.