Atyraýda Grýzııaǵa 60 myń dollar alyp bara jatqan qazaqstandyq ustaldy
Atyraý oblystyq memlekettik kirister departamenti baspasóz qyzmetiniń málimetinshe, qazaqstandyq 20 jastaǵy azamat Atyraý-Kýtaısı baǵytyndaǵy halyqaralyq reıspen ushpaq bolǵan.
«H.Dospanova atyndaǵy Atyraý halyqaralyq áýejaıyndaǵy keden beketi men Atyraý oblysy boıynsha tergep-tekserý departamentiniń qyzmetkerleri 3 qarashada Atyraý- Kýtaısı reısimen ushatyn jolaýshylardyń qol júkterine tekserý júrgizdi. Qazaqstan Respýblıkasy Prezıdentiniń 2022 jylǵy 14 naýryzdaǵy jarlyǵyna sáıkes, Qazaqstan Respýblıkasynyń Ulttyq Banki áketý kúnine belgilengen baǵam boıynsha eseptelgen jáne 10 000 (on myń) AQSh dollary balamasynan asatyn somadaǵy qolma-qol shetel valıýtasyn jáne shetel valıýtasyndaǵy aqsha quraldaryn áketýge tyıym salynǵan. Áýejaıdaǵy «RAPISCAN» rentgen televızııalyq apparaty arqyly kedendik baqylaý júrgizý kezinde Qazaqstan Respýblıkasynyń 20 jastaǵy azamaty B.F-nyń qol júginen 60 700 (alpys myń jeti júz) AQSh dollary, 10 000 (on myń) Reseı rýbli jáne 7 000 (jeti myń) teńge aqsha anyqtaldy», -dep habarlady departamenttiń baspasóz qyzmeti.
Qazir atalǵan derekke qatysty QR Ákimshilik quqyqbuzýshylyq týraly kodeksiniń 545- babymen is qozǵaldy.
Eske sala ketelik, budan buryn Atyraýda túrli quqyq buzýshylyq jasaǵan 1 113 adamnan saýsaq izi alynǵanyn habarlaǵan edik.