Atyraýda fermerler «Dárigerlerge – sharýagerlerden» qaıyrymdylyq aktsııasyn bastady
«Qazaqstan fermerler odaǵy» qoǵamdyq birlestigi Atyraý oblystyq fılıalynyń tóraǵasy Murat Sarmanovtyń aıtýynsha, aktsııanyń basty maqsaty – aq halatty abzal jandardy tabıǵı taza ónimmen qamtý, qoldaý kórsetip, demeý bolý. Osy maqsatty kózdegen óńir fermerleri atalǵan aktsııaǵa belsendilikpen qatysýda.
«Qurmanǵazy» óndiristik kooperatıviniń tóraǵasy, oblystyq máslıhattyń depýtaty Sabyrjan Sultanov 1 mıllıon teńgege baǵalanǵan 15 qoıdyń etin jiberdi. Ony ár aýrýhanada jumys isteıtin, sondaı-aq, oqshaýlanǵan medıtsına qyzmetkerlerine berip jatyrmyz. Jylyoı aýdanynyń sharýagerleri 175 lıtr shubat pen 67 lıtr qaımaq, 1,5 tonna kókónis, dárýmeni mol jemis ónimderin usyndy. Fermerler tarapynan uıymdastyrylǵan kómektiń alǵashqy legi Atyraý qalasyndaǵy barlyq medıtsına ujymyna, sondaı-aq, karantınge oqshaýlanǵan medıtsına qyzmetkerlerine, Sábıler úıine jetkizildi. Ónimniń bári – tabıǵı. Bul qazirgi qıyn shaqta aq halattylarǵa qýat beredi dep senemiz» - dedi Murat Sarmanov.
Onyń aıtýynsha, «Dárigerlerge –sharýagerlerden» qaıyrymdylyq aktsııasy karantın aıaqtalǵanǵa deıin jalǵasady. Fermerler apta saıyn medıtsına qyzmetkerlerin tabıǵı ári taza ónimdermen qamtamasyz etedi.