Atyraýda esirtkini kóshedegi kóliktiń terezesinen satqan
Oblystyq polıtsııa departamentiniń baspasóz qyzmetinen málim etkendeı, bul derek jergilikti ýaqytpen keshki saǵat 20:35 shamasynda beınebaqylaý kamerasyna túsken.
«Atyraý qalalyq polıtsııa basqarmasy jedel basqarý ortalyǵynyń qyzmetkerleri beınebaqylaý kamerasy arqyly Avangard shaǵynaýdanynda «Skoda» markaly kóliktiń terezesinen áıeldiń tórt er adamǵa belgisiz nárseni bergenin baıqaǵan. Ortalyq qyzmetkerleri jaqyn mańdaǵy patrýldik polıtsııa qyzmetkerlerine tıisti málimet bergen. Patrýldik polıtsııa qyzmetkerleri atalǵan avtokólikti Jeruıyq shaǵynaýdany tusynan toqtatty. Tekserý kezinde atalǵan kólik júrgizýshisiniń alkogoldik, esirtkilik, ýytqumarlyq masań kúıde ekeni anyqtaldy», -dep habarlady departamenttiń baspasóz qyzmeti.
Atalǵan derek boıynsha 1992 jylǵy júrgizýshige qatysty QR Ákimshilik quqyqbuzýshylyq týraly kodeksiniń 608-babynyń 1-bóligine (Júrgizýshiniń kólik quralyn alkogoldik, esirtkilik jáne ýytqumarlyq masań kúıde basqarýy) sáıkes ákimshilik hattama toltyryldy.
Sot sheshimimen kólik júrgizýshisi 7 jyl merzimge kólik basqarý quqyǵynan aıyrylyp, 15 táýlikke ákimshilik qamaýǵa alyndy.
Al, kólikte otyryp, psıhotropty dári satqan áıelden 13 dana tramadol men 5 dana tropıkamıd psıhotropty dárileri tárkilendi. Oǵan qatysty sheshim shyǵarý úshin medıtsınalyq saraptama taǵaıyndaldy.
Eske sala ketelik, budan buryn Atyraýda kóligimen 17 keli marıhýana tasymaldaǵan júrgizýshi qamaýǵa alynǵanyn jazǵan edik.
Kólik júrgizýshisi «Atyraý-Aqtóbe» tasjolynyń 30-shaqyrymynda totatylǵan. Onyń basqarýyndaǵy «Toyota Ipsum» markaly kóliginen jalpy salmaǵy 17 keli tartatyn marıhýana tabylǵan. Esirtki zaty tárkilendi.
Keıin Atyraýda esirtki tasymaldaýmen aınalysqan Nıgerııa azamaty ustalǵanyn habarlaǵan bolatynbyz.
Shetel azamaty aıǵaq zattarmen ustaldy. «Shevrolet cruze» markaly avtokóligin tintý kezinde árqaısysy bólek taspaǵa oralǵan 5 dana polıetılen qap tárkilendi. Saraptama nátıjeleriniń qorytyndysymen tárkilengen zattyń jalpy salmaǵy 5 gr «mefedron» sıntetıkalyq esirtkisi ekendigi anyqtaldy.
Esirtki tasymaldaǵan sheteldikke qatysty QR Qylmystyq kodeksiniń 296-babynyń 4-bóligi boıynsha sotqa deıingi tergeý amaldary júrgizilip jatyr. Kúdikti Atyraý qalasyndaǵy ýaqytsha ustaý ızolıatoryna qamaýǵa alyndy.