Atyraýda esirtki saqtaǵan boıjetken qamaýǵa alyndy

Atyraýda sıntetıkalyq esirtkini zańsyz saqtaǵan 22 jastaǵy boıjetken qamaýǵa alyndy, dep habarlaıdy QazAqparat tilshisi.

Atyraý oblystyq polıtsııa departamenti baspasóz qyzmetiniń málimetinshe, 2001 jylǵy boıjetken áleýmettik jelidegi jarnama arqyly jumysqa ornalasqan.

Esirtki qylmysyna qarsy is-qımyl qyzmetkerleri qala aýmaǵynda sıntetıkalyq esirtki zattaryn saqtaǵan kúdiktini ustady. Kúdikke ilingen boıjetkennen tárkilengen esirtkige uqsas zattarǵa saraptama júrgizildi. Onyń qortyndysyna sáıkes alynǵan zattar 13,66 gramm «Alfa-PVP» jáne 0,94 gramm «Mefedron» sıntetıkalyq esirtki ekeni dáleldendi. Qazir kúdiktige qatysty «kúzetpen ustaý» túrindegi bultartpaý sharasy qoldanyldy, - dep habarlady departamenttiń baspasóz qyzmeti.

Polıtsııa qyzmetkerleri atalǵan derek boıynsha QR Qylmystyq kodeksiniń 297-babynyń 3-bóligimen sotqa tergep-tekserýdi bastady. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.

Qazaqstan Respýblıkasy Konstıtýtsııasynyń 77-babynyń 3-tarmaǵynyń 1 tarmaqshasyna, Qylmystyq-protsestik kodeksiniń 19-babynyń 1-bóligine sáıkes adamnyń kináli ekendigi zańdy kúshine engen sot úkimimen tanylǵansha ol jasalǵan qylmysqa kináli emes dep esepteledi, -dep málim etti baspasóz qyzmetinen.

Eske sala ketelik, buǵan deıin Atyraýǵa jumysqa turýǵa kelgen BQO turǵynynan 1,5 myń doza esirtki tárkilengenin jazǵan edik. Kúdikti Batys Qazaqstan oblysynan tamyzda Atyraýǵa jumysqa turýǵa kelgen. Alaıda, polıtseıler kúdigine ilingen odan aq tústi untaq tárizdi zaty bar 50 orama, mekenjaıynan aq tústi untaq tárizdi zaty bar 3 dana zıp-paket tárkilendi. Saraptama qorytyndysyna sáıkes tárkilengen zattardyń jalpy salmaǵy 447,89 gr jáne 1 500 doza sıntetıkalyq esirtki ekeni dáleldendi.