Atyraýda eki kúnde 9 adam donerden ýlanyp qaldy
Oblystyq sanıtarııalyq-epıdemıologııalyq baqylaý departamenti basshysynyń orynbasary Álııa Bekeshovanyń málimetinshe, óńirde tamaqtan ýlaný deregi jyl basynan beri alǵash ret tirkelip otyr.
«Keshe oblystyq ınfektsııalyq aýrýhanaǵa 7 adam ýlaný dıagnozymen tirkeldi. Al, búgin taǵy 2 jaǵdaı anyqtalyp otyr. Oqıǵa S. Datov kóshesinde ornalasqan jeke menshik «Afisha» dúńgirsheginde bolǵan. Zardap shegýshiler tez taǵam daıyndaý ornynan qus etinen jasalǵan doner jegen. Osy oqıǵaǵa baılanysty Atyraý qalalyq polıtsııa basqarmasynyń qyzmetkerleri tergeý amaldaryn júrgizip jatyr. Qazir tıisti saraptamalar taǵaıyndaldy. Dúńgirshek jumysyn ýaqytsha toqtatty. Al, zardap shegýler dárigerlerdiń jiti qalaǵalaýyna alyndy», - deıdi Álııa Bekeshova.
Departament basshynyń orynbasary Gúlnaz Irbatyrovanyń aıtýynsha, kóktem-jaz aılarynda jedel ishek ınfektsııasy aýrýynyń qaýpi artady. Іshek juqpalary – as qorytý jolyn zaqymdaıtyn zııandy aýrýdyń biri. Sondyqtan, únemi jeke bas gıgıenasyn saqtap, azyq-túlikti belgilenbegen oryndardan satyp almaý kerek.
Budan buryn Atyraýda adam ómirine qaýipti 1,5 tonnadan astam taýyq eti joıylǵan edi.
Atyraý qalasyndaǵy kóterme jáne bólshek saýda nysandarynan sanıtarlyq-epıdemıologııalyq saraptama júrgizý úshin 108 túrli taýyq etiniń synamasy alynǵan. Saraptama nátıjesinde 40%-dan astamy Keden odaǵynyń tehnıkalyq reglamentteri talaptaryna sáıkes kelmeıtini anyqtalǵan.
«Makınsk qus fabrıkasy» JShS-niń broıler-balapan etinen adam ómirine qaýip tóndiretin bakterıologııalyq kórsetkishi tabyldy. Osyǵan baılanysty iri kásipkerlik sýbektisi – «Metro Kesh end Kerrı» JShS-ǵa jospardan tys tekserý taǵaıyndaldy. Tekserý kezinde ónim sapasynyń talapqa sáıkes emestigi anyqtalyp, satylymdaǵy 1 tonna 597,65 keli broıler taýyq etin joıý týraly sanıtarlyq-epıdemıologııalyq nusqama berilgen bolatyn.