Atyraýda eki aıda meıramhanalardan 73 keli bekire tabyldy
Oblystyq polıtsııa departamentiniń baspasóz qyzmetinen málim etkendeı, 1 sáýir men 31 mamyr aralyǵynda ótkizilgen «Bekire» jedel profılaktıkalyq is-sharasyna 21 qyzmetker tartylǵan.
«Atyraý oblysynda Isataı, Qurmanǵazy jáne Jyloı aýdany Kaspıı teńizine taıaý ornalasqan. Jaıyq-Kaspıı sý aıdyndarynda baǵaly bekire balyǵyn zańsyz aýlaý, saqtaý derekteri azaımaı otyr. Osyǵan baılanysty departamenttiń balyq qorlaryna qylmystyq qol suǵýshylyqqa qarsy is-qımyl bóliminiń qyzmetkerleri udaıy reıd ótkizedi. Polıtsııa qyzmetkerleri 1 sáýir-31 mamyr aralyǵynda Kaspıı teńizinen zańsyz balyq aýlaýshylar mingen 3 qaıyqty ustady. Zań buzýshylarǵa qatysty qylmystyq is qozǵalyp, tergeý tobyna tapsyryldy. Sondaı-aq, turǵyn úılerdi tekserý kezinde 12 keli bekire tuqymdas balyǵy tárkilendi. Al, meıramhanalardy tintý barysynda 73 keli bekire balyǵy tabyldy», -dep habarlady departamenttiń baspasóz qyzmeti.
Polıtsııa departamentinen «Bekire» is-sharasyna 8 avtokólik, 7 sý qaıyǵy tartylǵan. Jaıyq ózeniniń Atyraý qalasy aýmaǵyndaǵy bóliginde quqyq buzýshylyqty anyqtaý úshin 1 qaıyq bólingen.
Eske sala ketelik, budan buryn Atyraý oblysynda brakonerlerden 770 keliden astam bekire tárkilengenin habarlaǵan bolatynbyz.
«Bekireni zańsyz aýlaǵandarǵa qatysty 28 qylmystyq is qozǵaldy. Zań buzýshylarǵa 11,1 mln teńgege aıyppul salyndy. Zańsyz aınalymnan 7 tonna 534 keli balyq, onyń ishinde 770,25 keli bekire tuqymdas balyq túrleri, 29,5 keli qara ýyldyryq alyndy. Brakonerlerden 257 balyq aýlaý quraly, 62 sý kóligi men 12 avtomashına tárkilendi. Balyq resýrstaryna 400 mln teńgeden astam zalal keltirildi», - dep habarlady komıtettiń baspasóz qyzmetinen.