Atyraýda din zańnamasyn buzǵandarǵa 1 mln teńge aıyppul salyndy
Oblystyq polıtsııa departamenti baspasóz qyzmetiniń málimetinshe, dinı turǵydaǵy quqyq buzýshylyqtyń 43 deregi anyqtalǵan.
«Bıylǵy jyl basynan beri oblystyq din isteri basqarmasynyń qyzmetkerlerimen birlesip, áleýmettik jelilerde zańsyz dinı materıaldardyń taralýynyń aldyn alý maqsatynda monıtorıng jumystary júrgizildi. Sonyń nátıjesinde dinı saladaǵy ákimshilik quqyq buzýshylyqtyń 43 deregi tirkeldi. Anyqtalǵan ákimshilik quqyqbuzýshylyq jasaǵan adamdarǵa qatysty QR Ákimshilik quqyqbuzýshylyq týraly kodeksiniń 453-babymen (BAQ quraldarynyń ónimin, sol sııaqty ózge de ónimdi Qazaqstan Respýblıkasynyń aýmaǵynda daıyndaý, saqtaý, ákelý, tasymaldaý, taratý faktisi) jáne 490-babymen (Qazaqstan Respýblıkasynda dinı qyzmet jáne dinı birlestikter týraly zańnamasyn buzý) ákimshilik hattamalar toltyryldy», -dep habarlady polıtsııa departamentiniń baspasóz qyzmeti.
Polıtsııa qyzmetkerleri jınaqtalǵan is-qujat Atyraý qalasynyń ákimshilik quqyq buzýshylyqtar jónindegi mamandandyrylǵan sotyna joldady. Sot shemimimen zań buzýshylarǵa 1 mln-nan astam teńgeni quraǵan aıyppul salyndy.
Eske sala ketelik, Atyraýda urlyq jasaǵan destrýktıvti dinı aǵym ókili 4 jylǵa sottalǵanyn habarlaǵan edik.