Atyraýda destrýktıvti dinı aǵymnyń 44 ókiline 1,9 mln teńge aıyppul salyndy
Atyraý oblystyq din isteri basqarmasynyń basshysy Qaırolla Kóshqalıevtiń aıtýynsha, ákimshilik quqyq buzýshylyq quqyq qorǵaý organdarynyń qyzmetkerlerimen birge áleýmettik jelige júrgizilgen monıtorıngte anyqtalǵan.
«Destrýktıvti aǵymǵa erýshilerdiń kópshiligi óz paraqshalarynda jáne pablıkterde Qazaqstan Respýblıkasynyń aýmaǵynda tyıym salynǵan ekstremıstik ıdeologııany nasıhattaýǵa nemese úgitteýge baǵyttalǵan beıne jáne aýdıomaterıaldardy jarııalaǵan.
Bıylǵy 8 aıda basqarmanyń aqparattyq-taldaý ortalyǵynyń mamandary dástúrli emes dinı baǵytty nasıhattaıtyn 143 825 paraqshany buǵattady. Sondaı-aq, dinı baǵyttaǵy aqparatty taratatyn áleýmettik jelilerdegi paraqshalardy zerdeleý nátıjesinde 139 240 bet anyqtaldy. Onyń 442-si jat ıdeologııa materıaldaryn taratýǵa arnalǵan. Sol sebepten, dintaný saraptamasyna jiberildi», -deıdi Qaırolla Kóshqalıev.
Onyń málimetine súıensek, 8 aıda monıtorıngtik nátıjesimen QR Ákimshilik quqyqbuzýshylyq týraly Kodeksiniń 453 jáne 490-babymen destrýktıvti dinı aǵym ókilderi tarapynan 44 ákimshilik quqyq buzýshylyq anyqtalǵan. Jınaqtalǵan materıaldar sotqa joldanyp, salynǵan aıyppuldyń jalpy somasy 1 917 347 teńgeni quraǵan. Qazir 8 ákimshilik is sotta qaralyp jatyr.
Eske sala ketelik, budan buryn Atyraýda 24 mln teńgeniń esirtkisin satpaq bolǵan dinı aǵym ókilderi ustalǵanyn 4 jazǵan edik.