Atyraýda destrýktıvti dinı aǵym ókili turatyn úıdiń aýlasynan marıhýana tabyldy
Oblystyq polıtsııa departamenti baspasóz qyzmetiniń málimetinshe, destrýktıvti dinı aǵym ókiliniń buryn sottalǵany anyqtalǵan.
«Ekstremızmge qarsy is-qımyl basqarmasynyń qyzmetkerleri túngi saǵat 22:15 shamasynda destrýktıvti dinı aǵymdy ustanatyn 2000 jylǵy turǵynnyń Atyraý qalasyndaǵy úıiniń aýlasyna tekserý is-sharasyn júrgizdi. Tekserý kezinde jalpy salmaǵy 90,2 grammdy quraıtyn marıhýana esirtki zatyn tárkiledi. Destrýktıvti dinı aǵym ókiliniń buryn sottalǵany anyqtaldy», -dep habarlady departamenttiń baspasóz qyzmeti.
Polıtsııa qyzmetkerleri atalǵan derek boıynsha ustalǵan kúdiktige qatysty QR Qylmystyq kodekstiń 296-babynyń 2-bóligimen sotqa deıingi tergep-tekserýdi júrgizip jatyr.
Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.
Eske sala ketelik, budan burynAtyraý oblysynda zańsyz aınalymnan 60 keliden astam esirtki tárkilengenin habarlaǵan edik.
Oblystyq polıtsııa departamentiniń bastyǵy, polıtsııa polkovnıgi Nurhat Orazbaevtyń aıtýynsha, asa iri kólemde esirtki saqtaýdyń 17 deregi anyqtalǵan.
«Polıtsııa qyzmetkerleri asa iri kólemde esirtki saqtaýǵa qatysty 17 derekti anyqtady. Onyń ishinde sıntetıkalyq esirtki saqtaýǵa qatysty 9 derek bar. Al, marıhýanany zańsyz saqtaýdyń 3 deregi tirkeldi. Bıylǵy jyl basynan tirkelgen bul sanattaǵy qylmystardyń ishinde 8 derek Taraz, Qaraǵandy, Aqtóbe, Semeı Shyǵys Qazaqstan oblystarynan jáne Nıgerııa, Ózbekstan, Qyrǵyzstan Respýblıkalarynan kelgen tulǵalar tarapynan jasalyp otyr. Zańsyz aınalymnan jalpy salmaǵy 60 keliden astam esirtki tárkilendi», -dep málim etti Nurhat Orazbaev.