Atyraýda daryndy balalarǵa arnalǵan sport mektep-ınternaty ashyldy
Mektep-ınternattyń dırektory Qaırat Dosqalıevtiń aıtýynsha, bilim ordasyna 150 bala qabyldanady. Qazir 199 úmitker qujat tapsyrǵan. Munda oqýshylar erkin kúres, boks, dzıýdo, taekvondo sekildi olımpıadalyq sport túrleri boıynsha jattyǵady.
Sporttyq baǵyttaǵy bilim ordasynda tálim alý úshin qujat tapsyrǵannyń biri – Bekzat Mustaǵalıev. Mahambet aýdanynda turatyn óren 6 jyldan beri dzıýdomen aınalysady.
«Biz bul mektep-ınternattyń ashylýyn asyǵa kúttik. Ózimiz tańdaǵan sport túrinen sheberlik shyńdap, Olımpıada chempıony bolýǵa umtylamyn. Óıtkeni munda biliktilik arttyrý úshin mol múmkindik bar», - deıdi Bekzat Mustaǵalıev.
Mahambet aýdanynyń Saraıshyq aýylynda turatyn Qadyrbek Shaımardanov nemeresin ertip kelgen.
«Aýyl balalary Atyraý qalasyndaǵy dzıýdo klýbyna kelip, jattyǵyp júr edi. Qalaǵa qatynaý úshin balalar ýaqyt joǵaltady. Onyń ústine jolda júrý sharshatady. Endi jańa mektep-ınternat ashylǵanyn estip, nemeremdi ákeldim. Qazir olardy olımpıada oıyndaryna daıyndaýǵa múmkindik jasalyp otyr», - deıdi Qadyrbek Shaımardanov.
Sport mektebine qabyldaý emtıhanyna jattyqtyrýshylar men chempıondar shaqyrylǵan. Máselen, erkin kúresten álem chempıony Talǵat Syrbazdyń aıtýynsha, sportqa den qoıǵan ár bala qıyndyqqa tózimdi bolýy qajet.
«Olımpıada, álem chempıondarynyń deni aýyldan shyǵady. Men de aýylda óstim. Aýylda jattyǵyp júrip, álem chempıony boldym. Endi aýyldyń balalary olımpıadalyq sport túrlerine daıyndaıtyn mektep-ınternatta shyńdalatynyna qýanyp turmyn. Bul – jasóspirimderge berilgen úlken múmkindik. Jas sportshylardyń sheberligin shyńdap, chempıon atanýy úshin shydamdy ári eńbekqor bolǵanyn qalar edim», -deıdi Talǵat Syrbaz.
Mektep-ınternattaǵy sabaq 1 qyrkúıekte bastalady. Mekteptegi pándermen birge, eki mezgil jattyǵý sabaǵy ótedi.
Eske sala ketelik, budan buryn 227 myńnan astam atyraýlyq sportpen turaqty shuǵyldanatynyn jazǵan edik.