Atyraýda dalaǵa katalızatorǵa uqsas qaldyqtyń tógilýine qatysty tekserý júrgizilmek
«Prokýratýra tarapynan katalızatorǵa uqsas qaldyqty dalaǵa tókken kompanııany anyqtaý úshin aldyn ala taldaý júrgiziledi. Qorshaǵan ortaǵa qaýipti qaldyqqa jaýapty kompanııa anyqtalǵannan keıin ǵana tekserý bastalady», - dep málim etti Atyraý oblysynyń tabıǵat qorǵaý prokýrory Erkebulan Ermekov.
Al «Atyraý munaı óńdeý zaýyty» JShS qoǵammen baılanys bóliminiń málimetinshe, katalızatorlar zaýyttyń tehnologııalyq protsesine paıdalanylady. Onyń qaldyǵyn shyǵarý men joıýdy merdiger kompanııa júzege asyrady.
«Ekologııalyq kodekske sáıkes Atyraý munaı óńdeý zaýyty lıtsenzııa negizinde qaldyqtardy joıý operatsııalaryn júzege asyratyn mamandandyrylǵan kompanııamen kelisimshart jasaıdy. Kelisimshartqa sáıkes qoldanylǵan qatalızatorlar arnaıy merdiger kompanııalardyń kómegimen joıý maqsatynda zaýyt aýmaǵynan shyǵarylady», - dep habarlady zaýyttyń qoǵammen baılanys bólimi.
Munaı óńdeý zaýytynyń ókilderi Atyraý oblysynyń mamandandyrylǵan tabıǵat qorǵaý prokýratýrasy jáne oblystyq Ekologııa departamentiniń mamandarymen birge qaldyqtar tabylǵan jerge barǵan.
«Katalızator boksıt, tseolıt, alıýmosılıkat sekildi tabıǵı materıaldardan jasalady. Jumys kezinde katalızator belsendiligin joǵaltyp, odan ári paıdalanýǵa jaramsyz kúıge túsedi. Kómirsýtek qaldyqtarynan tazartylǵannan keıin katalızator joıýǵa jiberiledi. Daladan tabylǵan katalızatorlardyń bul aýmaqta jatqanyna 2-3 jyl boldy dep boljanyp otyr. AMÓZ prokýratýraǵa zaýytta paıdalanylǵan katalızatorlardy shyǵarý boıynsha qyzmet kórsetken kompanııalardyń barlyǵyna qatysty tekserý júrgizý týraly ótinish joldady. Qajetti dálelder men faktilerdi jınaqtaýǵa jan-jaqty kómek kórsetý úshin málimettermen bólisti. Tabylǵan katalızatorlardyń AMÓZ-ge qatysynyń bar-joǵy tekserý barysynda anyqtalady», -dep málim etti qoǵammen baılanys bóliminen.
Buǵan deıin Atyraýda dalaǵa tógilgen katalızatorǵa uqsas qaldyqtar jartylaı kómilgenin habarlaǵan edik.