Atyraýda daǵdarys ortalyǵyna jyl basynan 24 áıel men 63 bala túsken
Atyraý oblysy ákimi apparaty janyndaǵy áıelder isteri jáne otbasylyq-demografııalyq saıasat jónindegi komıssııa hatshysy Zámzágúl Jalmýrzınanyń aıtýynsha, munaıly shaharda 2012 jyldan daǵdarys ortalyǵy jumys isteıdi. Mundaı ortalyqtar Jylyoı jáne Qurmanǵazy aýdanynda bar. Endi Isataı aýdanynda otbasyn qoldaý jáne daǵdarys ortalyǵyn ashý kózdelgen.
«Qıyndyqqa ushyraǵan áıelder men olardyń balalaryna psıhologııalyq, quqyqtyq, medıtsınalyq kómek kórsetiledi. Jyl basynan ortalyqqa 24 áıel men 63 kishkentaı bala tústi. Qazir olardyń sany azaıyp, 5 ana men 16 balaǵa kómek kórsetilip otyr», - dep málim etti turmystyq zorlyq-zombylyqqa ushyraǵan áıelderge kómek kórsetý bólimshesi dırektorynyń orynbasary Aıbarshyn Imanǵalıeva.
Jergilikti polıtsııa qyzmeti áıelderdi zorlyq-zombylyqtan qorǵaý tobynyń ınspektory, polıtsııa aǵa leıtenanty Áıgerim Oraqbaevanyń málimetinshe, zábir kórgenderden kúnine 20-25 habar túsedi.
«Jyl basynan otbasy-turmystyq qatynastar aıasynda áıelderge qatysty jasalǵan qylmystar men quqyq buzýshylyqtarǵa baılanysty túsken shaqyrtý 2 myńnan asyp otyr. Otbasynda kıkiljiń shyǵaryp, zábir kórsetken 677 adamǵa qatysty QR Ákimshilik quqyq buzýshylyq týraly kodeksiniń 73-babymen ákimshilik jaýapkershilikke tartyldy», - dep habarlady Áıgerim Oraqbaeva.
Eske salaıyq, budan buryn Atyraýda ata-ana qamqorlyǵynsyz qalǵan 11 bala úı kezegine qoıylmaǵanyn jazǵan edik.