Atyraýda burynǵy hımııa zaýytyndaǵy órt sóndirildi

ATYRAÝ. QazAqparat – Atyraýda hımzaýyttaǵy órt sóndirildi, dep habarlaıdy QazAqparat tilshisi.

«Órt jumys istemeıtin hımııalyq zaýyttyń eki qabatty ǵımaratynan shyqqan. Keıin bul jerden «Mańǵystaý ındýstrııalyq parki» JShS-ǵa tıesili polıetılen paketter óndiretin tseh ashylǵan. Órt 350 sharshy metr aýmaqty sharpyǵan, onda tsellofan qaldyqtary janǵan. Ǵımarattyń jalpy aýmaǵy - 6 myń sharshy metr. Oqıǵa ornyna eki órt sóndirý qyzmeti jetti. Órt aýyzdyqtalyp, sóndirildi. Eshkim zardap shekken joq», - dep habarlady oblystyq TJD baspasóz qyzmetinen.

Órttiń sebebi anyqtalyp jatyr.

Budan buryn habarlaǵanymyzdaı , Atyraýda buryn polımerler shyǵarylǵan zaýyt aýmaǵynda órt shyqty. Qazir munda hımııalyq ónimder shyǵarylmaıdy. Biraq, zaýyt aýmaǵynda birneshe óndiris jumys istep jatyr.