Atyraýda «Bolashaqqa baǵdar: rýhanı jańǵyrý» úılestirý ortalyǵy ashyldy

ASTANA. QazAqparat - «Bolashaqqa baǵdar: rýhanı jańǵyrý» úılestirý ortalyǵynyń jobalyq keńsesi H.Dosmuhamedov atyndaǵy Atyraý memlekettik ýnıversıtetinde ornalasqan, dep habarlaıdy Atyraý oblystyq óńirlik kommýnıkatsııalar qyzmeti. 

Ortalyq qyzmetkerleriniń quramyna memlekettik organdar, jastar resýrstyq ortalyǵy, mádenıet jáne bilim berý salalarynyń ókilderi kirdi. Jańa organnyń negizgi baǵyttaryna «Týǵan jer», «Qasıetti jerler», «100 jańa esim» kiredi.

«100 jańa esim» baǵyty qoǵamdy óz kásibinde bıik belesterdi baǵyndyrǵan tek tanymal tulǵalardy ǵana emes, sondaı-aq jalpy eldiń damýyna úlken úles qosqan azamattardy úlgi etý arqyly tárbıeleýge baǵyttalǵan.

«Biz sondaı adamdardy taýyp, olardyń basqa da adamdarǵa úlgi bolýy úshin qoǵamdyq sanany jańǵyrtý arqyly sol adamdar týraly aıtýymyz qajet», - dedi úılestirý ortalyǵy saraptamalyq keńesiniń basshysy, tarıh ǵylymdarynyń doktory Muhtar Ábilseıit.

Aıta keteıik, saraptamalyq keńestiń quramyna ǵalymdar, ólketanýshylar, Atyraý oblysyndaǵy Qazaqstan halqy Assambleıasynyń ókilderi men jýrnalıster kirdi. Keńestiń músheleri «Bolashaqqa baǵdar: rýhanı jańǵyrý» baǵdarlamalyq maqalasyna sáıkes is-sharalar ótkizý boıynsha úkimettik emes uıymardan, etnomádenı birlestikterden, jastar jáne ardagerler uıymdarynan, jeke tulǵalardan túsken ıdeıalar men usynystardy qarap, qabyldaıdy.