Atyraýda bıyl 96 egiz ómirge kelgen

ATYRAÝ. QazAqparat – Atyraýda jyl basynan beri oblystyq perınataldyq ortalyǵynda 6 796 sábı ómirge kelgen. Onyń ishinde 96 egiz, bir úshem bar, dep habarlaıdy QazAqparat tilshisi.

Atyraý oblystyq perınataldyq ortalyǵy dırektorynyń orynbasary Almıra Sabyrǵalıevanyń málimetinshe, ótken jylmen salystarǵanda egizder sany 9,1 paıyzǵa artqan.

«Byltyr oblystyq perınataldyq ortalyqta 7 375 náreste jaryq dúnıe esigin ashqan edi. Al, bıylǵy jyl basynan beri 6 796 sábı dúnıege keldi. Onyń ishinde egizderdiń sany arta tústi. Bizdiń ortalyqtyń dárigerleri men kishi býyn qyzmetkerleri bıylǵy 9 aıda 96 egiz ben bir úshemniń ómirge aman-esen kelýine medıtsınalyq kómegin berdi. Jyl sońyna deıin týý kórsetkishi taǵy ósedi degen úmittemiz», -deıdi Almıra Sabyrǵalıeva.

Onyń aıtýynsha, 19 qańtarda 52 jastaǵy áıel «Ańsaǵan sábı» jobasymen tuńǵysh sábıin bosanǵan.

«Bul jasta ómirge sábı ákelý ońaı emes. Bizdiń patsıent kóp jyl emdelgen. Keıin «Ańsaǵan sábı» jobasymen bólingen kvotaǵa sáıkes, EKU arqyly bala kótergen. Oǵan 19 qańtarda ota jasaldy. Ómirge salmaǵy 3 keli 70 gram, boıy 51 sm sábı keldi», -deıdi Almıra Sabyrǵalıeva.

Al, 6 qyrkúıekte úshem dúnıege kelgen. Ekeýiniń salmaǵy – 1 keli 800 gramm, úshinshisi – 2 keli 200 gramm. Jas otbasy Eset Qumar men Aıangúl Sábıtova jańa týǵan úshemge Ahmad, Batyrhan, Ismaıl esimin bergen.

Eske sala ketelik, buǵan deıin Egizder sherýine Atyraý oblysynda 99 bala qatysqanyn jazǵan bolatynbyz.