Atyraýda bıyl 13 turǵyn úıge kúrdeli jóndeý jumystary júrgiziledi

ATYRAÝ. QazAqparat - Atyraýda segiz kóp qabatty turǵyn úıde termojańǵyrtý baǵdarlamasy boıynsha jóndeý jumystary aıaqtalady. Turǵyn úılerdi jóndeýden ótkizý jumystaryn tamyz aıynyń basynda aıaqtaý josparlanyp otyr, dep habarlaıdy QazAqparat tilshisi.

Atyraý qalalyq ákimdiginiń baspasóz qyzmetiniń habarlaýynsha, bıyl termojańǵyrtý baǵdarlamasy boıynsha qurylys jumystary 8 úıde, atap aıtsaq, Avangard yqshamaýdanynda, Q.Sátbaev kóshesi men Vokzal mańy yqshamaýdanynda bastaldy. Tamyz aıynyń basynda merdigerler 8 úıdi PIK-ke tapsyrady. Qazir Avangard-2 yqshamaýdanyndaǵy №15 kóp qatarly turǵyn úıde jóndeý jumystary bitti.

«Munda jumysshylar úıdiń shatyryn, elektr symdar júıesin aýystyryp, kireberisterdi áktedi, domofon ornatty, ystyq, sýyq sý júretin qubyrlardy jóndedi, jertóleni qurǵatyp, jóndeýden ótkizdi. Merdiger mekeme, sondaı-aq, káriz qubyrlaryn aýystyryp, barlyq kireberisterge jylý esepteýishterin ornatty. Endi turǵyndardyń jylý shyǵyndary únemdeletin bolady. Termojańǵyrtý baǵdarlamasy aıasynda turǵyn úıdiń qasbeti tolyq boıalyp, balkonnyń syrtqy jaǵyna metalprofıl ornatyldy, kireberisterdiń terezeleri aýystyryldy», - deıdi «Turǵyn úılerge kommýnaldyq qyzmet kórsetý» JShS basshysynyń orynbasary Rústem Qabdol.

Sonymen qatar qaıtarylǵan qarajat esebinen oblys ortalyǵyndaǵy taǵy da 4 turǵyn úıde jóndeý-qalpyna keltirý jumystary bastaldy. Munda da barlyq kommýnıkatsııalar jańartylyp, shatyr jabyndysy aýystyrylady. Erterekte salynǵan alty turǵyn úıge jedelsaty ornatý da josparda bar.

«Bıyl jyl aıaǵyna deıin 13 kóp qabatty turǵyn úıge kúrdeli jóndeý jasaýdy josparlap otyrmyz. Onyń jeteýinde kommýnıkatsııalar jańartylady, B.Momyshuly kóshesindegi úsh úıge, Q.Sátbaev kóshesindegi 52, 54, 56 úılerge barlyǵy alty úıge jańa lıft ornatylady», - deıdi R. Qabdol.

Aıta ketý kerek, bıyl termojańǵyrtý baǵdarlamasyn júzege asyrýǵa qalalyq bıýdjetten 430 mln teńgege jýyq qarjy bólindi. Onyń 70 paıyzy ıgerildi, aldaǵy qyrkúıek aıynda qarajat tolyq ıgeriledi.