Atyraýda birneshe shaǵynaýdanda jaryq sónip qaldy

ATYRAÝ. QazAqparat – Atyraý qalasynyń birneshe shaǵynaýdanynda jaryq sónip qaldy. Bul derekti Atyraý oblysynyń energetıkalyq kesheniniń baspasóz qyzmeti rastady, dep habarlaıdy QazAqparat tilshisi.

Atyraý qalasynda Jaıyq ózeniniń sol jáne oń jaǵalaý bóligindegi «Balaýsa», «Rakýsh», «Leshoz», «Avangard» pen «Nursaıa», «Jeruıyq» shaǵynaýdandarynda apattyq jaǵdaı tirkeldi. Soǵan baılanysty ýaqytsha jaryq bolmaıdy. Apattyń sebebi anyqtalyp, qalpyna keltirilgen soń jaryq tolyqtaı beriledi

, - dep habarlady energetıkalyq keshenniń baspasóz qyzmeti.

Áleýmettik jelidegi aqparatqa qaraǵanda, munaıly shahardaǵy «Aqsaı», «Juldyz», «Kóktem», «Balyqshy» shaǵyn aýdandarynda da jaryq óshken.

Elektr qýatynyń joqtyǵynan baǵdarshamdar istemeı qalǵan. Sol sebepten, keıbir kóshelerdiń qıylysynda kólik keptelisi baıqaldy.

Buǵan deıin erteń Atyraý qalasynyń 25 kóshesinde kúni boıy elektr energııasy óshiriletinin habarlaǵan edik.

Sondaı-aq, Atyraýdyń bir bóliginde turǵyndar 3 kún ystyq sýsyz otyratyny habarlandy. Ystyq sý berý 3 shildede toqtatylǵan. Bul úzilis 5 shildege deıin jalǵasady. Osy kezeńde úsh jylý pýnkttinde jabdyqtardy tekserý júrgiziledi.

«Turǵyn úılerge ystyq sý berýdi toqtatý kúrdeli jóndeý josparyna sáıkes jylý pýnktteriniń jabdyqtaryn tekserýmen baılanysty bolyp otyr. «Atyraý jylý júıeleri» AQ 2023 jylǵy 3-5 shilde aralyǵynda úsh jylý berý pýnktinde jóndeý jáne tekserý júrgizedi», - dep habarlady energetıkalyq keshenniń baspasóz qyzmeti.