Atyraýda bir top azamatqa merekelik medal tabystaldy

ATYRAÝ. QazAqparat – Atyraýda bir top azamat «Qazaqstan halqy Assambleıasyna – 25 jyl» merekelik medalimen marapattaldy, dep habarlaıdy QazAqparat.

«Budan 25 jyl buryn etnosaralyq qatynasty úılesimdi etý úshin Qazaqstan halqy Assambleıasy qurylǵan bolatyn. Assambleıa konstıtýtsııalyq mártebege ıe boldy. Qazir Qazaqstan halqy Assambleıasy – elimizdegi etnostar ókilderin bir shańyraq astyna toptastyratyn qurylym. Osyndaı myqty ınstıtýttyń arqasynda Qazaqstan – beıbitshiliktiń besigi, yrys pen yntymaqtyń mekenine aınaldy», dedi oblys ákimi Mahambet Dosmuhambetov.

Ákim QR Prezıdentiniń Jarlyǵyna sáıkes Atyraý oblysynyń bir top azamattaryna «Qazaqstan halqy Assambleıasyna – 25 jyl» merekelik medalin tabystady. Nagradtalǵandardyń arasynda qoǵamdyq uıymdar men partııalardyń, etnomádenı birlestikter men BAQ ókilderi bar.