Atyraýda bir mektepte 40 muǵalimniń jumys orny bos tur
Mektep-gımnazııa ákimshiliginiń málimetinshe, bilim ordasyna turaqty jumys isteýge pán muǵalimderi qajettigi týyndap otyr.
«Atyraý qalasyndaǵy jalpy bilim beretin №3 mektep-gımnazııasy Bilim jáne ǵylym mınıstriniń 2020 jylǵy 21 aqpandaǵy №57 buıryǵymen bekitilgen memlekettik bilim berý uıymdarynyń birinshi basshylary men pedagogterin laýazymǵa taǵaıyndaý, laýazymnan bosatý qaǵıdalary negizinde bos oryndarǵa pedagog qyzmetkerlerdi taǵaıyndaý úshin konkýrs jarııalaıdy. Konkýrs qujattary 14-22 tamyz aralyǵynda qabyldanady», -delingen bilim ordasynyń habarlandyrýynda.
Máselen, oqýshylarǵa ınformatıka pániniń qyr-syryn meńgertetin 3, bastaýysh synyptarǵa 7 muǵalim kerek. Matematıka, orys tili men ádebıeti, tarıh pánderiniń árqaısysyna 4 muǵalimnen qajet. Qazaq tili men ádebıeti pánderinen dáris beretin 2, oqýshylardy kórkem eńbekke baýlıtyn 4 muǵalimniń orny bos tur. Hımııa, fızıka, geografııa pánderiniń árqaısysy úshin bir-bir pedagogtan jumysqa shaqyrylǵan.
Sondaı-aq, bir-birden sport nusqaýshysy men sheberhana meńgerýshisi, pedagog-uıymdastyrýshyny, hımııa, bıologııa, fızıka jáne ınformatıka pánderi úshin 4 zerthanashy kerek. Mektep dırektoryna 2 orynbasar qajet. Orynbasardyń birine oqý isi, al, ekinshisine tárbıe isi jónindegi mindet júkteledi.
Eske sala ketelik, buǵan deıin Atyraýda 13 mektep pen 12 balabaqsha dırektorynyń laýazymdyq orny bos turǵanyn habarlaǵan edik.
Sondaı-aq, Atyraý mektepterinde 600-den astam muǵalim jetispeıtinin jazǵan bolatynbyz.