Atyraýda bir kúnde 3,4 mln teńge aıyppuly tólenbegen 12 júrgizýshi ustaldy
Oblystyq polıtsııa departamentiniń baspasóz qyzmetinen málim etkendeı, 12 júrgizýshiniń 3 mln 450 myń teńge aıyppulyn tólemeı júrgeni anyqtalǵan.
«Atyraý qalalyq polıtsııa basqarmasy jedel basqarý ortalyǵynyń qyzmetkerleri Interceptor júıesi arqyly aıyppul tólemegen 12 júrgizýshini anyqtap, patrýldik polıtsııa qyzmetkerlerine baǵyttama berdi. Máselen, Mercedes Benz markaly kóligi júrgizýshisiniń 1 mln 338 myń teńge tólenbegen 48 aıyppuly bar. Bul kólik Armenııa Respýblıkasynan ákelingen. Al, Grýzııadan jetkizilgen Lexus kóligi júrgizýshisiniń tólemeı júrgen 29 aıyppulynyń somasy – 667 734 teńge. Patrýldik polıtsııa qyzmetkerleri aıyppuly tólenbegen avtokólikterdiń júrgizýshilerin toqtatyp, QR Ákimshilik quqyqbuzýshylyq týraly kodeksiniń 785-babyna sáıkes hattama toltyrdy. Kólikter arnaýly turaqqa qoıyldy», - dep habarlady departamenttiń baspasóz qyzmeti.
Al, 20 jastaǵy júrgizýshi saǵat 1:40 shamasynda birneshe márte jol erejesin buzǵany anyqtalyp otyr.
«Kólik quralyn basqarý quqyǵy joq júrgizýshi qaýipsizdik beldigin taqpaı, Ábilhaıyrhan dańǵylynda, H. Dospanova atyndaǵy Atyraý halyqaralyq áýejaı turaǵynda jol jabyndysyn lastap, jolda júrý qaýipsizdigin qadaǵalamaı, manevr jasaý erejesin buzǵan. Patrýldik polıtsııa qyzmetkerleri 20 jastaǵy azamatqa qatysty QR Ákimshilik quqyqbuzýshylyq týraly kodeksi 612-babynyń 2-bólimimen (Kólik quralyn basqarý quqyǵy joq adamnyń ony basqarýy), 593-babynyń 2-bólimimen (Qaýipsizdik beldikterin nemese motoshlemderdi paıdalaný qaǵıdalaryn saqtamaý), 630-babynyń 1-bólimimen (Joldardy, onyń ishinde jol jabyndysyn lastaý), 595-babynyń 1-bólimimen (Manevr jasaý qaǵıdalaryn buzý), ákimshilik hattamalar toltyrdy», - dep málim etti baspasóz qyzmetinen.
Júrgizýshige 98 016 teńge kóleminde aıyppul salyndy. Avtokólik arnaýly turaqqa qoıyldy.
Eske sala ketelik, Atyraýda 20-ǵa jýyq adamnyń 3 mln teńgesin jymqyrǵan alaıaq ustalǵanyn jazǵan edik.