Atyraýda bir kúnde 1 myńnan astam kóshet egilip, 34 tonna qoqys jınaldy
Atyraý qalalyq ákimdigi baspasóz qyzmetiniń málimetinshe, «Taza tabıǵat» respýblıkalyq aktsııasy aıasynda senbilik uıymdastyrylǵan.
«Munaıly shaharda 15 naýryz ben 15 mamyr aralyǵynda tazalyqtyń eki aılyǵy ótip jatyr. Osyǵan baılanysty ár apta saıyn senbilik ótkizilip keledi. Al, «Taza tabıǵat» respýblıkalyq aktsııasyn qoldaý maqsatynda qalanyń ár aýmaǵyn qamtyǵan senbilikke 29 tehnıka tartylyp, 34 tonna qoqys shyǵaryldy. Senbilikke qatysýshylar Ábilqaıyr han dańǵylyna, «Samal» shaǵyn aýdany men aýyldyq okrýgterde 1 095 tal kóshetin ekti», -dep habarlady qalalyq ákimdiktiń baspasóz qyzmeti.
Eske sala ketelik, budan buryn Atyraýda memlekettik qyzmetshiler Jaıyq jaǵalaýyn qoqystan tazartqan bolatyn.
Memlekettik qyzmetshiler Jaıyq ózeniniń 4 shaqyrymǵa deıingi jaǵalaýynan turmystyq qoqystardy jınaýǵa qatysty.
Jınalǵan qoqys «Arnaıyavtobaza» JShS-niń kólikterimen arnaıy polıgonǵa tasymaldandy.
Keıin atyraýlyqtar Oralǵa qatynaıtyn jol jıegine 500 kóshet ekkenin habarlaǵan bolatynbyz.
Oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Nurlan Jantoqovtyń málimetinshe eldi mekenderinde kógaldandyrý men jasyl aımaqtar qurýdyń 2021-2025 jyldarǵa arnalǵan óńirlik jospary bar.
Sonyń aıasynda 275 gektar aýmaqqa 540 myń kóshet egiledi. Bıyl 54,7 ga jerge 111 042 kóshet josparlanǵan.
«Atyraý oblysynda ormandardy ósirý men molaıtýdyń keshendik josparyna sáıkes 5 jylda 2 803 gektar alqapq 7 mln kóshet egý josparǵa engizildi. Soǵan sáıkes 2023 jyly 573,5 gektar jerge 1 439 myń kóshetin egý josparlanǵan edi. Qazir kóshet egý jumystary júrgizilip jatyr», -dedi Nurlan Jantoqov.