Atyraýda bir aıǵa jýyq ýaqyt buryn joǵalǵan qyzdyń múrdesi tabyldy
Kámeletke tolmaǵan balanyń denesi tabylǵany týraly atasy Amangeldi Qazbekov áleýmettik jelide jazdy.
«Meniń nemerem Ásemaıym tabyldy. Erteń saǵat 10-da namazyn shyǵarý uıǵaryldy», -degen Amangeldi Qazbekov.
Buǵan deıin habarlaǵanymyzdaı, Atyraýda jasóspirim 6 sáýirde úıinen shyǵyp ketip, keıin oralmaǵan. Oblystyq Tótenshe jaǵdaılar departamentiniń qutqarýshylary izdeýge 7 sáýirde kiristi.
Keıin qyz balanyń joǵalýyna qatysty týraly jańa málimetter belgili boldy.
«Sońǵy beınebaqylaý kamerasynan Ásemaıdyń tek kópirge kóterilip bara jatqany kórindi. Sol jaǵadaǵy bir turǵyn úıdiń kamerasyn qaraýǵa úmitimiz boldy. Alaıda úı ıesi 3 kún úıinde bolmaǵan edi. Úı ıesi ańshylyqqa ketken eken. Keıin onyń kelgenin bildik. Ásemaıdyń ákesi sol úıdiń kamerasyn qarap shyqty. Ókinishke oraı kameradan Ásemaı qyzymyzdyń kópirden sekirip ketkeni kóringen», - dep habarlady jergilikti belsendi Sandýǵash Kýkenova.
Sondaı-aq 16 jasar qyzdy izdestirip jatqan súńgýirler jumysty toqtatýǵa májbúr bolǵanyn jazǵan edik.
«Osy kezge deıin jedel-qutqarý jasaǵynyń súńgýirleri Jaıyq ózeniniń 730 sharshy metrden astam aýmaǵynda sý astynan izdeýdi júrgizdi. Alaıda, búgin, 19 sáýirde Jaıyq ózeninde sý deńgeıiniń kóterilýine, aǵystyń jyldamdyǵy men jel ekpininiń kúsheıýine baılanysty izdestirý toqtatyldy. Óıtkeni, súńgýirlerge ózen aǵysynyń jyldamdyǵy sekýndyna 2 metr bolǵanda izdestirýdi júrgizýge ruqsat etiledi. Qazir Jaıyq ózenindegi sý aǵysynyń jyldamdyǵy – sekýndyna 3,5-4 metr», - dep málim etken edi qoǵammen baılanys tobynan.