Atyraýda bir aptada Vero Cell vaktsınasyn 1,7 myń adam saldyrdy
13:08, 23 Tamyz 2021
ATYRAÝ. QazAqparat – Atyraýda bir aptada 1 700 adam Vero Cell vaktsınasynyń І komponentin saldyrdy, dep habarlaıdy QazAqparat.
Buǵan deıin Atyraý oblysyna Vero Cell vaktsınasynyń 10 myń dozasy, keıinnen bir kúnde eki túrli vaktsınanyń dozalary jetkizilgen.
«Atyraýǵa Vero Cell vaktsınasynyń taǵy da 10 myń dozasy jetkizildi. Bul dozalar óńirdegi barlyq egý beketine taratyldy. Osylaısha, aımaqqa jetkizilgen Vero Cell vaktsınasynyń jıyntyǵy 30 myń dozany qurap otyr. Turǵyndar tarapynan bul vaktsınany saldyrýshylar qatary arta tústi. Máselen, 17-22 tamyz aralyǵynda 1 700 atyraýlyq turǵyn qytaılyq Sinopharm kompanııasy shyǵarǵan vaktsınanyń I komponentin saldyrdy», dep habarlady oblystyq densaýlyq saqtaý basqarmasynyń baspasóz qyzmeti.