Atyraýda bir apta buryn joǵalǵan 33 jastaǵy jigit sharýa qojalyǵynan tabyldy
Bul derekti oblystyq polıtsııa departamentiniń baspasóz qyzmeti rastady.
«Іz-túzsiz joǵalyp ketken 33 jastaǵy jigitti izdestirý is-sharasy úzdiksiz júrgizildi. Ony izdestirý Atyraý qalasynda da, Qyzylqoǵa aýdanynda da qolǵa alyndy. Іzdestirý is-sharasyna Atyraý qalalyq polıtsııa basqarmasy men Qyzylqoǵa aýdandyq polıtsııa bóliminiń qyzmetkerleri tartyldy. Sonyń nátıjesinde Qyzylqoǵa aýdandyq polıtsııa bóliminiń qyzmetkerleri habar-osharsyz ketken jigitti Temirbaı ýchaskesindegi sharýa qojalyǵynan tapty», -dep habarlady departamenttiń baspasóz qyzmeti.
Qyzylqoǵa aýdanyndaǵy Muqyr aýylynan 70 shaqyrym qashyqtyqtaǵy atalǵan ýchaskede qysqy mal azyǵyna qajetti pishen daıyndaý jumystary júrip jatyr. Polıtsııa qyzmetkerleri jigittiń aman-esen tabylǵany týraly týystaryna habarlaǵan. Týystary izdeý salǵan jigitten zorlyq-zombylyq belgisi ushyramaǵany, sharýa qojalyǵyna pishen daıyndaýǵa óz erkimen kelgeni anyqtalǵan. Ol týystarymen baılanyspaýyna mobıldi telefonynda aqaýy bolǵanymen túsindirgen.
Eske sala ketelik, budan buryn Atyraýda iz-túzsiz joǵalǵan 33 jastaǵy jigit bir aptadan beri tabylmaı jatqanyn habarlaǵan bolatynbyz.
Іz-túzsiz joǵalǵan jigit 8 tamyzda Atyraý qalasyna kelgen. Mobıldi telefonmen týysyna temirjol vokzaly mańynda turǵanyn habarlap, sodan keıin baılanysqa shyqpaǵan. Sol kúnnen beri mobıldi telefony óship turǵan.
«Polıtsııa qyzmetkerleri atalǵan derekke baılanysty jedel izdestirý is-sharasyn bastady. Qazir izdestirý jumystary júrip jatyr», -dep málim etken edi departamenttiń baspasóz qyzmeti.