Atyraýda Bezymıannyı kólindegi ottegi mólsheri men sý tereńdigi tekserildi
Jaıyq-Kaspıı oblysaralyq basseındik balyq sharýashylyǵy ınspektsııasynyń basshysy Orynbasar Ámirjanovtyń málimetinshe, múndaı is-sharanyń maqsaty – atalǵan kólde balyqtyń qyrylýynyń aldyn alý.
«Bizdiń ınspektsııanyń ınspektorlary «Balyq sharýashylyǵy ǵylymı-óndiristik ortalyǵy» JShS qyzmetkerlerimen birge Atyraý qalalyq ákimdigine qarasty Qaıyrshaqty aýyldyq okrýgindegi Bezymıannyı kóliniń qazirgi jaǵdaıyna baqylaý júrgizdi. Tekserý kezinde Bezymıannyı kólindegi sýdyń jalpy temperatýrasy – 21.7ºS, otteginiń ortasha mólsheriniń esebi – 7.3 mg/dm3, sondaı-aq, sý tereńdigi 2 metrge jýyq ekeni anyqtaldy», - dep málim etti Orynbasar Ámirjanov.
Sońǵy kúnderi Jaıyq ózeniniń bir saǵasy – Bezymıannyı kólindegi sý deńgeıi túsken. Soǵan qaramastan, balyqtardyń qyrylý deregi tirkelgen joq.
«Qazir Bezymıannyı kólinde balyqtardyń qyrylý faktisi tirkelmedi. Aldaǵy ýaqytta arnaıy komıssııa músheleri shabaqtardy qutqarý jumystaryn qolǵa alady. Sonymen qatar, kóldegi balyqtardy Jaıyq ózenine álsin-álsin jiberip turý josparlanyp otyr», - deıdi Orynbasar Ámirjanov.
Onyń aıtýynsha, bıylǵy sáýir-mamyr aılarynda Bezymıannyı kólinde balyqtyń qyrylý faktisi tirkelgen.
«Osyǵan oraı arnaıy kommısııa qurylyp, balyqtardy qutqarý jumystary júrgizildi. Sonyń nátıjesinde 65 keli óli balyq jınalyp, sanıtarlyq talaptarǵa saı kómý jolymen joıyldy», - dedi ınspektsııa basshysy.
Eske sala ketelik, 26 sáýirde Atyraý qalalyq ákimdigine qarasty Qaıyrshaqty aýyldyq okrýgindegi Bezymıannyı kólinde balyqtyń qyrylý sebebi aıtylǵanyn jazǵan edik.
Sol kezde «Jaıyq-Kaspıı» oblysaralyq basseındik balyq sharýashylyǵy ınspektsııasynyń ınspektorlary balyqtyń álsiregen kúıde qaırańǵa shyǵyp qalǵanyn anyqtady. Bul balyqtyń qyrylýyna sebep bolýy múmkin ekeni aıtyldy. Álsiregen balyqtardy qutqarý jumystary júrgizildi. Balyqtardyń ýyldyryq shashý ornyna erkin kirýi úshin Qaıyrshaqty okrýgi aýmaǵynan 800 metr kanal qazyldy. Kanaldyń tereńdigi – shamamen 1 metr.