Atyraýda bes mekteptiń oqýshylary tórtinshi toqsandaǵy sabaqty onlaın oqıdy
Atyraý qalalyq bilim bólimi basshysynyń orynbasary Erlan Balmuhanovtyń málimetinshe, №13, 31, 19, 22 jáne 27-mektepte kúrdeli jóndeý jumystaryn bastaý úshin osyndaı sheshim qabyldanǵan.
«Atalǵan mektepterdiń oqýshylary tórtinshi toqsanda sabaqty qashyqtan oqýǵa aýystyryldy. Sebebi, naýryzdyń sońynda bes mektepte kúrdeli jóndeý jumystaryn bastaý josparlanyp otyr. Qazir merdiger mekemelermen sharttar jasalyp, daıyndyq jumystary júrgizilip jatyr. Jóndeý jumystaryn júrgizý merzimi 3,5 aıdan 6,5 aıǵa deıin sozylady», -dep habarlady Erlan Balmuhanov.
Onyń aıtýynsha, keıbir mektepterdiń ǵımaraty paıdalanýǵa berilgenine 50 jyldan asqan. Máselen, 1330 oqýshy bilim alatyn Q.Sátpaev atyndaǵy №19 mektep-gımnazııasynyń ǵımaraty 1972 jyly iske qosylǵan.
Sodan beri bilim ordasynyń shatyry, jylý júıesi, terezesi ǵana aýystyrylǵan. Ǵımaratqa jeńil jóndeý júrgizilgen. Al, elektr jelisi burynǵy kúıinde tur.
«Kúrdeli jóndeý jumystary avtorlyq jáne tehnıkalyq qadaǵalaý mekemeleriniń qatysýymen bekitilgen jobalyq-smetalyq qujattar negizinde atqarylady. Eger jóndeý jumystary kanıkýl kezinde bastalsa, jańa oqý jylyna deıin tolyq aıaqtalmaýy múmkin. Osyndaı sebep eskerilip, atalǵan mektepterdegi oqýshylardy onlaın formatta oqytýǵa sheshim qabyldandy», -dep málim etti Erlan Baımúhanov.
Eske sala ketelik, buǵan deıin Atyraýda tóbesi tesik mekteptiń bastaýysh synyp oqýshylary onlaın oqýǵa jiberilgenin habarlaǵan bolatynbyz.
Oblys ákiminiń orynbasary Jasulan Bısembıevtiń málimetinshe, №30 mektep-gımnazııasynyń tóbesinen sý aǵyp, 40 kabınet jaramsyz bolyp qalǵan.
«Ata-analardyń usynysy eekerilip, oqý jylynyń sońyna deıin bastaýyshtaǵy 1-4-synyptardyń oqýshylaryn túgeldeı onlaın formatta oqýǵa jiberý týraly sheshim qabyldandy. Al, 5-11-synyptardyń oqýshylaryn mektep-gımnazııaǵa jaqyn ornalasqan eki kolledjdiń bos kabınetterinde oqytý uıymdastyrylady. Joǵary synyptardaǵy oqý sapasyn tómendetpeý úshin osyndaı qadamǵa barýǵa týra keldi», -dep málim etti Jasulan Bısembıev.